Túrkmenstan Prezidenti Serdar Berdimuhamedov «Oraylıq Aziya – Evropa Awqamı» birinshi sammitinde qatnasıw ushın Ózbekstanǵa keldi.

Samarqand xalıqaralıq aeroportında joqarı mártebeli miymandı Ózbekstan Respublikası Bas ministri Abdulla Aripov hám basqa rásmiyler kútip aldı.
Bul sammit kún tártibine muwapıq, Oraylıq Aziya mámleketleri hám Evropa Awqamı arasındaǵı kóp táreplemeli qatnasıqlar hám ámeliy birge islesiwdi rawajlandırıw perspektivaları kórip shıǵıladı.
Doslıq, isenim, jaqsı qońsıshılıq hám strategiyalıq sheriklik principlerine tiykarlanǵan kóp táreplemeli Ózbekstan hám Túrkmenstan qatnasıqları jedel rawajlanıp atırǵanın atap ótiw orınlı.
Bir mısal, ótken jılı óz-ara tovar almasıw kólemi bir milliard dollardan asqan. Sanaat, energetika, transport, awıl hám suw xojalıǵı, ekonomikanıń basqa tarmaqlarında óz-ara paydalı birge islesiw rawajlanbaqta hám kooperaciya tereńlespekte.
Birgelikte «Shavat-Tashawz» shegaraaldı sawda zonası shólkemlestirilmekte. Jedel aymaqlararalıq baylanıslar hám mádeniy-gumanitarlıq almasıw baǵdarlaması sheńberinde ilajlar turaqlı ótkerip kelinbekte.

Ikrom AVVALBOEV,
Otabek MIRSOATOV (súwret), ÓzAnıń xabarshıları