Ámiwdárya rayonı hákimliginde Ózbekstan Respublikası Prezidentiniń “2025-jılı respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw ilajları haqqında” qararınıń orınlanıwın támiyinlew baǵdarında ámelge asırılıp atırǵan jumıslar hám keleshektegi rejelerge baǵıshlanǵan májilis bolıp ótti.

Onda Qaraqalpaqstan Respublikası Ishki isler ministriniń birinshi orınbasarı J.Ataev, rayon hákimi S.Xwjametov, rayon Prokuraturası, Ishki isler bólimi juwapkerleri, hákim orınbasarları, bólimler, shólkemlerdiń basshıları hám “Máhálle jetiligi” juwapkerleri qatnastı, – dep maǵlıwmat beredi Ámiwdárya rayonı hákimligi Málimleme xızmeti bólimi.
– Búgingi kúnde huqıqbuzarlıqlardıń aldın alıw, jınayatshılıqtı saplastırıw máselesi mámleketlik siyasat dárejesine kóterilgen, jınayatshılıqqa qarsı gúresiw, huqıqbuzarlıqlardıń profilaktikası boyınsha huqıq qorǵaw uyımları menen birge juwapker uyımlarǵa áhmiyetli wazıypalar júklengen hám bul baǵdardaǵı reformalardıń orınlanıwın támiyinlew boyınsha bir qatar ilajlar ámelge asırılıp atır, – dep atap ótti rayon hákimi S.Xwjametov shıǵıp sóylegen sózinde.
Sonday-aq, Qaraqalpaqstan Respublikası Ishki isler ministriniń birinshi orınbasarı J.Ataev shıǵıp sóylep, joqarıdaǵı Prezident qararı menen belgilep berilgen máhállelerde qáwipsiz ortalıqtı jaratıw baǵdarındaǵı tiykarǵı wazıypalarǵa toqtap ótti.
Ótken jılı jınayat júz bergen hár bir máhállede kriminogen jaǵdaydı turaqlastırıw hám jınayatlardıń erte aldın alıwdıń máhálleler kesiminde hár shereklik mánzilli ilajların belgilegen halda máhálle – rayon – wálayat dárejesinde onıń orınlanıwı ushın tikkeley juwapker basshılar biriktirilgenligi hám anıq tarawlıq juwapkershilik júklengeni atap ótildi.
Májilis dawamında xalıqtıń huqıqıy sanasın, jámiyetlik belsendiligin hám puqaralıq juwapkershiligin arttırıw, jınayat júz beriwine sebep bolıwı múmkin bolǵan sociallıq mashqalalardı sheshiwge jámiyetshilik wákilleri, nuranıylar hám máhálle belsendilerin keńnen tartıp barıw, máhállelerdiń jámiyetlik orınları hám turaq jaylarında qáwipsiz ortalıq jaratıw sıyaqlı máselelerge itibar qaratıldı.
Sonıń menen birge, puqaralardıń turmısı, densawlıǵı hám múlkine hár qanday qáwiplerdiń aldın alıw maqsetinde huqıqbuzarlıqlar profilaktikasına zamanagóy sanlı texnologiyalar hám texnikalıq qurallardı keńnen engiziw zárúr ekenligi atap ótildi.

Qaraqalpaqstan xabar agentligi