Xojeli rayonında medicinalıq xızmet kórsetiwdiń sapasın arttırıw hám xalıqtıń salamatlıǵın jaqsılaw maqsetinde Buxara wálayatınan tájiriybeli qánigeler tartıldı.

Buxara wálayatı Densawlıqtı saqlaw basqarmasına qaraslı emlew-profilaktika mákemelerine qaraslı emlew-profilaktika mákemeleriniń jetik qánigeleri usı háptede Xojeli rayonı medicina birlespesinde medicinalıq tekseriwlerdi ámelge asırmaqta.
Atap aytqanda, 24 shıpaker hám 6 bas miyirbiykeden ibarat topar rayonlıq kóp tarmaqlı oraylıq poliklinikasınıń 3-filialında óz jumısın basladı.
Medicinalıq tekseriwler hám mobil xızmetler shólkemlestirilip, qánigeler tárepinen xalıqqa zamanagóy medicinalıq xızmet kórsetiw maqsetinde mobil oftalmologiyalıq poliklinika, “Ókpe salamatlıǵı” mobil avtomashinası, sonday-aq, UZI, EKG hám laboratoriyalıq tekseriwler shólkemlestirildi.
Shıpakerler 3 jumısshı toparǵa bólingen. Birinshi topar 14 qánigeden ibarat bolıp, 670 adamdı medicinalıq tekseriwden ótkerdi. Olardan 187 puqaraǵa ambulator sharayatta, 77 puqaraǵa rayon emlewxanasında stacionar sharayatta emleniw ushın usınıslar berildi. Sonday-aq, 5 nawqas xirurgiyalıq operaciyaǵa jiberildi.
Ekinshi topar (6 bas miyirbiyke) salamat turmıs tárizi hám durıs awqatlanıw boyınsha úgit-násiyat jumısların alıp bardı. Bul topar xalıq arasına kirip, shańaraqlarda medicinalıq másláhátler berdi.
Úshinshi topar wálayattaǵı eń tájiriybeli 6 xirurg-qánigelerden quralǵan bolıp, olar tárepinen rayonlıq oraylıq emlewxanasında xirurgiyalıq operaciyalar orınlandı.
Bul medicinalıq sapar dawamında jergilikli xalıqtıń salamatlıǵına baylanıslı mashqalalar anıqlanıp, olardıń nátiyjeli emleniwi ushın barlıq sharayatlar jaratıldı. Sonıń menen birge, Buxara wálayatı qánigeleriniń tájiriybesi Xojeli rayonındaǵı medicinalıq xızmet kórsetiwdiń sapasın bunnan bılay da arttırıwǵa xızmet etedi.
Bunday birgeliktegi joybarlar keleshekte de dawam ettiriliwi rejelestirilgen bolıp, xalıqtıń medicinalıq xızmetten razılıǵı hám densawlıǵın jaqsılaw maqset etilgen.
Buxaralı shıpakerlerdiń Xojeli rayonındaǵı medicinalıq jumısı dawam etpekte.

Á.Jiyemuratov,
Qaraqalpaqstan xabar agentligi.