Paytaxtımızda Ózbekstan Respublikası joqarı bilimlendiriw, ilim hám innovaciyalar ministri Qwnǵratboy Sharipov Qırǵız Respublikasınıń Ózbekstandaǵı Ayrıqsha hám tolıq huqıqlı elshisi Duyshonqul CHotonov penen ushırasıw ótkerdi.

Bul ushırasıwda eki mámleket arasında joqarı bilimlendiriw, ilim hám innovaciyalar tarawındaǵı birge islesiwdi rawajlandırıwǵa baylanıslı áhmiyetli máseleler dodalandı. Tárepler bilimlendiriw tarawındaǵı baylanıslardı jańa basqıshqa alıp shıǵıw zárúrligin atap ótti.
Sóylesiw dawamında birge islesiwdiń áhmiyetli baǵdarları boyınsha pikir alısılıp, ótken dáwir ishinde bir qatar ámeliy jumıslar islengeni atap ótildi.
Sonıń ishinde, Ózbekstan tárepi qırǵızstanlı studentler ushın 100 mámleketlik grant ajıratqan bolıp, házirgi kúnde 360 qırǵızstanlı student Ózbekstan joqarı bilimlendiriw mákemelerinde bilim almaqta.
«Tashkent irrigaciya hám awıl xojalıǵın mexanizaciyalaw injenerleri institutı» Milliy izertlew universiteti hám Qırǵızstan ilimiy mákemeleri menen birgelikte suw resursların basqarıw boyınsha ilimiy grant joybarı ámelge asırılmaqta. Hár eki mámlekette joqarı bilimlendiriw mákemeleri rektorlarınıń forumı ótkerilip, ótken jıllarda 90 nan aslam birge islesiw shártnamasına qol qoyılǵan.
Bunnan tısqarı, tárepler zıyarat turizmin rawajlandırıw maqsetinde ilimiy-izertlew orayın shólkemlestiriw, sonday-aq, turaqlı energetika boyınsha Ferǵana mámleketlik texnika universiteti hám Qırǵızstan universitetleri menen mikroGES qurıw joybarın ámelge asırıw imkaniyatların kórip shıǵıwǵa kelisti.
Ushırasıw juwmaǵında bul birge islesiw ellerimiz arasındaǵı doslıq qatnasıqların bunnan bılay da bekkemlewge isenim bildirildi.

ÓzA