Báhár máwsiminde elimizde jańalanıw, jasarıw bayramı bolıp belgilenetuǵın Nawrız bayramı respublikamız boylap orınlarda kóterińki keypiyatta bayramlanbaqta.

Taqıyatas rayonında da «Qádiriyatlarıń máńgi bolsın, Nawrız!» atamasında bayram ilajı bolıp ótti.

Bayram saltanatında rayon hákimi K.Aytbaev sózge shıǵıp, xalqımızdı gózzallıq, jańalanıw áyyyamı bolǵan Nawrız benen qızǵın qutlıqlap, elimizde Prezidentimizdiń basıshılıǵında alıp barılıp atırǵan reformalar rayon xalqınıń jaqsı turmıs keshiriwi ushın da keń imkaniyatlardı jaratıp berip atrıǵanlıǵı haqqında ayta otırıp, diyqanlardıń qırmanı bálent bolıwın tiledi.
Bunnan soń kórkem óner sheberleri menen birge jas talant iyeleri tárepinen teatrlastırılǵan bayram kompoziciyası qoyıp berildi. Milliy qosıqlar atqarılıp, ayaq-oyınǵa túsip, bayram ilajı milliy taǵamlar kórgizbesi hám sport tamashaları menen dawam etti. Qoshqar dúgisi, qoraz urısı hám sport jarıslarınıń jeńimpazları shólkemlestiriwshiler tárepinen múnásip sıylıqlandı. Bayram rayondaǵı máhállelerde dawam etpekte.

Qaraqalpaqstan xabar agentligi