Alternativ energiya dereklerinen paydalanıw alıs aymaqlarda da keńnen engizilmekte.

Ózbekstan Respublikası Prezidentiniń 2023-jıl 16-fevraldaǵı «Qayta tikleniwshi energiya dereklerin hám energiya únemlewshi texnologiyalardı engiziwdi jedellestiriw haqqında»ǵı qararı menen orınlarda quyash panellerin ornatıw jumısların muwapıqlastırıw wazıypası bajıxana uyımlarına biriktirilgen. Usı baǵdarda Qaraqalpaqstan Respublikası Bajıxana basqarmasında dúzilgen jumısshı topar wákilleri Ellikqala rayonındaǵı toqımashılıq kárxanasında ornatılǵan quyash panellerin orınǵa shıqqan halda úyrendi.
Jumısı tikkeley elektr energiyası menen baylanıslı hám oǵan talabı joqarı bolǵan bul kárxana házirgi waqıtta 50 kVt/saat quwatlılıqtaǵı quyash panellerin ornatqan. Sonıń nátiyjesinde qıstıń sońǵı aylarında elektr energiyasına tólenip atırǵan aqshanıń 5-6 million sum muǵdarın únemlewge erisken. Úlkemizge quyashlı kúnlerdiń kirip kiyatırǵanlıǵı inabatqa alınsa, bul kórsetkish jáne de ósiwi turǵan gáp.
Usı jerde orınlarda ornatılıp atırǵan quyash panelleriniń statistikasın júrgiziwdiń durıslıǵın tekseriw maqsetinde Bajıxana komiteti tárepinen “Jasıl energiya” málimleme sisteması engizilgen bolıp, bajıxana xızmetkerleri tárepinen orınlarǵa shıqqan halda úyrenilgen obektlerdiń maǵlıwmatları sistemada tastıyıqlanatuǵınlıǵın atap ótiwimiz kerek.
Usı kúnge shekem Qaraqalpaqstan Respublikasında jámi 23446 isbilermenlik subektlerine 15,43 MVt (megavatt), 4929 xalıq xojalıqlarına 15,13 MVt quwatlılıqtaǵı, 1136 sociallıq obekt hám mámleketlik mákemelerge 14,93 MVt quyash panelleri ornatılǵan. Ulıwma esapta aymaqta búgingi kúnde saatına 45 MVt.lıq elektr energiyasın alternativ energiya derekleri islep shıǵarmaqta.
Ellikqala rayonı Bostan qalası Íǵbal máhállesinde jasawshı Sh.Atamuratov shańaraǵına 6 kVt.lıq quwatlılıqtaǵı quyash panellerin ornatqan. Shańaraqqa tiyisli mútájligi ortasha 20 kVt.tı quraytuǵın shańaraq, zárúriyatın quyash panelleri esabınan tolıq qaplamaqta. Mútájliginen artqan energiyanı tarmaqqa jiberip, mámleketke satıw arqalı jılına 7-10 million sum muǵdarında dáramat ta tawıp atır.
Alternativ energiya derekleriniń ámeliyatqa keńnen engiziliwi mámleketimizde energiya jetispewshiliginiń aldın alıwǵa xızmet etip, qosımsha dáramat deregine de aylanıp atır. Bul bolsa óz gezeginde, elimiz ekonomikasınıń turaqlı ósiwine múmkinshilik jaratadı.

Qaraqalpaqstan xabar agentligi.