Nawrız ulıwma xalıq bayramı múnásibeti menen orınlarda bayram ilajları kóterińki ruwxta ótkerilmekte. Usınday bayram ilajı Ellikqala rayonındaǵı oraylıq amfiteatrda da bolıp ótti.

“Qádiriyatlarıń máńgi bolsın, Nawrız!” súreni astında ótkerilgen bayram saltanatları sheńberinde dáslep jıynalǵanlar rayon hákimi V.Niyazimbetovtıń basshılıǵında máhálle hám shólkemler tárepinen tayarlanǵan milliylik ruwxındaǵı kórgizbeler menen tanıstı,- dep maǵlıwmat beredi Ellikqala rayonı hákimligi Málimleme xızmeti bólimi.
Ellikqala rayonı orayındaǵı amfiteatr janındaǵı egislik maydanına “Jasıl mákan” ulıwma milliy joybarı sheńberinde miyweli terek nálleri egildi.
Rayon hákimi V.Niyazimbetov bayram koncert baǵdarlaması baslanıwınan aldın, Nawrız áyyyamı menen xalıqtı qutlıqlap, eń jaqsı tileklerin jolladı.
Sonday-aq, rayon hákimi belsendi máhálle basshılarına minnetdarshılıq xatın hám bahalı sawǵalar tapsırdı.
El súygen kórkem óner sheberleriniń shıǵıwları, báhárgi taǵamlar, milliy hám ónermentshilik ónimleriniń kórgizbeleri, teatr jámáátleri, hár qıylı ansambller hám kishkene balalardıń, folklor jámáátleriniń shıǵıwları bayram saltanatlarına ózgeshe payız baǵıshladı.
Rayon hákimliginiń baslaması menen rayondaǵı belsendi hayal-qızlar tárepinen tayarlanǵan súmelek, kárxana-shólkem, mákeme hám bilimlendiriw dárgayları tárepinen kórsetilgen milliy hám báhárgi taǵamlar kórgizbeleri, bezelgen otaw hám bayram dasturxanı elimizdegi molshılıq, qut-berekettiń belgisi boldı.
Seyil kórinisinde bolıp ótken bayram ilajı jas xudojniklerdiń súwret salıwı, quslar seyili, dárwaz oyınları, kitap yarmarkası, poeziya múlkinin eń saylandı úlgilerinen aytıslar aytqan jaslardıń ilajları menen jáne de kórkemlesti.
Nawrız túrli millet wákillerin birlestirgen, qádiriyatlar bayramı. Kóp milletli Watanımızda jasap atırǵan ózbek, qaraqalpaq, qazaq, túrkmen milletine tiyisli milliy dástúrler sáwlelendirildi.
Bayram saltanatları rayonnıń barlıq aymaqlarında dawam etpekte.

Qaraqalpaqstan xabar agentligi