Joqarı bilimlendiriwde zamanagóy reformalar

Berdaq atındaǵı Qaraqalpaq mámleketlik universitetinde búgingi kúnde sırt el joqarı oqıw orınları menen qatnasıqlardı ele de bekkemlew, ilim hám bilimlendiriw baǵdarında óz-ara birge islesiw nátiyjeliligin arttırıwǵa ayrıqsha itibar qaratılmaqta.
Usınday joqarı oqıw orınlarınıń biri – Qazaqstan Respublikası Sh.Esenov atındaǵı Kaspiy texnologiyaları hám injiniringi universiteti bolıp tabıladı.
Usı universitettiń «Kompyuter ilimleri» kafedrasınıń professorları B.Suleymanova hám E.Abdikerimovalar bes kún dawamında akademiyalıq mobillik programmasın ámelge asırıw maqsetinde universitettiń Matematika fakulteti «Algoritmlestiriw hám programmalastırıw texnologiyaları» kafedrasında xızmet saparında boldı.
Xızmet saparı dawamında B.Suleymanova hám E.Abdikerimovalar kafedranıń oqıw hám ilimiy-izertlew baǵdarlarındaǵı jumısları menen tanıstı hám kompyuter ilimleri hám programmalastırıw texnologiyaları tálim baǵdarınıń 2-3-kurs studentlerine “Veb programmalastırıw” páninen sheberlik sabaqların alıp bardı.
Sonday-aq, kafedralar arasında akademiyalıq mobillikti ornatıw, oqıw hám ilimiy jumıslardı rawajlandırıw, ilimiy maqalalardı baspadan shıǵarıw, ilimiy joybarlardı orınlaw sıyaqlı áhmiyetli jumıslar kelisip alındı.

Qaraqalpaqstan xabar agentligi.