Mámleketimiz basshısınıń Birlesken Arab Ámirliklerine rásmiy saparı sheńberinde Ózbekstan Respublikası Transport ministri Ilhom Mahkamov hám BAÁniń JETEX kompaniyası shólkemlestiriwshisi Adel Mardini arasında ushırasıw ótkerildi. Onda transport ministrligi hám JETEX kompaniyası arasında birge islesiw Memorandumına qol qoyıldı.
JETEX kompaniyası 2005-jılı dúzilgen bolıp, 5 kontinentte 30 biznes birlespesine iye global tarmaq bolıp esaplanatuǵının aytıp ótiw kerek. Pútkil dúnya boylap 50 den aslam orınlarda, sonıń ishinde, Jaqın Shıǵıs, Evropa, Aziya-Tınısh okeanı regionı, Afrika hám Amerikada kúni-túni qarıydarlarǵa xızmet kórsetiw menen shuǵıllanadı.
Bul memorandum mámleketimizdiń puqaralıq aviaciyası tarawında jańa perspektivalı joybarlardı ámelge asırıw ushın tiykar jaratadı. Atap aytqanda, JETEX kompaniyası «Tashkent-Shıǵıs» aeroportında FBO túrinde mámleketlik jeke menshik sherikligi tiykarında VIP hám CIP qarıydarlarǵa xızmet kórsetiwdi shólkemlestiriw boyınsha investiciyalıq joybardı ámelge asıradı.
FBO (Fixed Base Operator) – aeroportlarda hawa kemelerine janılǵı quyıw, toqtaw ornı, texnikalıq, ońlaw xızmetlerin kórsetiw, hawa kemelerin ijaraǵa beriw, charterlerdi satıw, taksi hám jáne basqa da kóplegen xızmet túrlerin kórsetiwshi shólkem.
Joybar sheńberinde kishi aviaciya tarawında ońlaw, satıw hám saqlaw xızmetleriniń jolǵa qoyılıwı, aerotaksi xızmeti hám VIP taksi engiziliwi, óz gezeginde turizm tarawınıń rawajlanıwına unamlı tásir kórsetedi hám VIP qarıydarlar ushın qolaylıq jaratadı.
Sonıń menen birge, biznes aviaciya tarawında 200 den kóbirek joqarı tájiriybeli jumıs orınları payda boladı.
Bir sóz benen aytqanda, JETEX kompaniyasınıń aldınǵı tájiriybesine súyengen halda mámleketimizde biznes aviaciyasın isenimli hám turaqlı rawajlanıwın támiyinlewge erisildi.

A.Rustamov, ÓzA