Oman Sultanlıǵınıń Tashkenttegi elshixanasında Ózbekstanǵa sapar etip kelgen Oman Sawda sanaat palatasınıń Qubla Ash-Sharqiya qorǵawındaǵı basqarmasınıń baslıǵı Anvar Hamid Al-Sananiy basshılıǵındaǵı 30 ǵa shamalas isbilermenler delegaciyası menen jergilikli biznes wákilleri arasında ushırasıw bolıp ótti. Ushırasıwda eki mámleket arasında eksport-import potencialın arttırıw, jańa imkaniyatlar jaratıw, sonday-aq, birge islesiwdi kúsheytiw máseleleri kórip shıǵıldı.
– Úlkeńizge saparımızdan oǵada quwanıshlımız, – dedi Anvar Hamid Al-Sananiy. – Oman Sultanlıǵı hám Ózbekstan Respublikası arasındaǵı qatnasıqlar oǵada eski hám biz bul qatnasıqlardı ekonomikalıq jaqtan jáne de rawajlandırıw tilegindemiz. Mámleketińizdiń azıq-awqat qáwipsizligi boyınsha kóp jıllıq tájiriybesi hám awıl xojalıǵı ónimlerin qayta islew tarawında alıp barılıp atırǵan jumıslar maqtawǵa ılayıqlı.
Ózbekstan-Oman biznes forumı hám V2V formattaǵı eki tárepleme ushırasıwlarda Oman sultanlıǵınıń mámleketimizdegi ayrıqsha hám tolıq huqıqlı elshisi Vafo bint Jabr Nosir Al-Busaidiy xanım óz pikirin bılayınsha bildirdi:
– Usı forum dawamında imkaniyatlar hám mashqalalar, potencial joybarlar haqqında sáwbetlestik. Isbilermen topar wákilleri anıq joybar usınısları tiykarında bizneste birge islesiw perspektivaların tolıq dodalaw imkaniyatına iye boldı.
Quwanıshlı tárepi, ánjuman sheńberinde Ózbekstan Еksportshıları associaciyası hám Omannıń “Thunder Logistics” kompaniyası arasında óz-ara birge islesiw haqqındaǵı memorandumǵa qol qoydı.
Omanlı hám ózbekstanlı isbilermenler jańa ekonomikalıq imkaniyatlar esigin ashatuǵın usı jıyınlarda sheriklik qatnasıqların jáne de rawajlandırıw, sawda hám investiciyalıq birge islesiwdi jedellestiriwden mápdar ekenin bildirdi.
Muharrama Pirmatova, Asliddin Alijonov (súwret),
Anvarxwja Ahmedov (video), ÓzA