Awıl xojalıǵı ministrligi juwapkerleri Afrika mámleketlerinde joqarı qosımsha qunǵa iye integraciyalasqan sanaat obyektlerin joybarlaw, qarjılandırıw, qurıw hám qollanıwǵa qánigelesken “Arise IIP” kompaniyasınıń bas direktorı Animesh Axaskar menen ushırastı.

Sóylesiw dawamında bul kompaniya menen birgelikte mámleketimizdiń agrar tarmaǵında ámelge asırıw múmkin bolǵan baǵdarlar, birgelikte jolǵa qoyılatuǵın joybarlardıń perspektivaları haqqında pikir alısıldı.
Dáslep, mámleketimizde jetistiriletuǵın awıl xojalıǵı ónimleriniń kólemi, qosımsha qun shınjırın jaratıw maqsetinde olardı qayta islew ushın imkaniyatlar hám fermer xojalıqları hám klasterlerdiń jumısı, sonday-aq, mámleketimizde investorlar ushın jaratılǵan imkaniyatlar haqqında tolıq maǵlıwmat berildi.
Bunnan soń Animesh Axaskar mırza kompaniya jumısı haqqında sóz etip, Afrika mámleketleri, atap aytqanda, Saudiya Arabstanı hám oǵan qońsı mámleketlerde ámelge asırǵan iri joybarlarına toqtap ótip, Ózbekstan menen de birgelikte bunday joybarlardı ámelge asırıwǵa tayar ekenin bildirdi.
Maǵlıwmat ornında atap ótiw kerek, kompaniya sońǵı jılları Afrika mámleketlerinde sanaat kemshiliklerin anıqlaw, jetistirilgen jergilikli shiyki zattı qayta islew, eksport kólemin arttırıw hám sawdanı jáne de qolaylastırıw ushın beyimlesiwsheń sheshimlerdi islep shıǵıw boyınsha kópshilikke tanılǵan.
Ushırasıw sońında tárepler óz-ara birgelikte ámelge asırıw múmkin bolǵan perspektivalı joybarlar paketin islep shıǵıw hám ámeliyatqa engiziw boyınsha jumıs alıp barıwǵa kelisti.

Muhayyo Toshqoraeva, ÓzA