Prezident Shavkat Mirziyoevtiń parlament palatalarında shıǵıp sóylegen sózleri, sonday-aq, 2025-jıldıń – «Qorshaǵan ortalıqtı qorǵaw hám «jasıl» ekonomika» jılı» dep járiyalanıwı múnásibeti menen atqarıw hákimiyatı uyımları basshı kadrları hám sektor basshılarınıń aldında turǵan wazıypalar boyınsha oqıw-ámeliy seminar baslandı.
Onda ministrlik hám uyımlardıń juwapkerleri Ferǵana, Namangan, Samarqand hám Tashkent wálayatlarınıń sektor basshıları qatnaspaqta.
Bul oqıw-ámeliy seminar Prezident janındaǵı Mámleketlik basqarıw akademiyasında belgilengen baǵdarlamaǵa muwapıq bes wálayattıń rayon, qalalarındaǵı sektor basshıları (hákim, prokuror, ishki isler bólimi hám salıq inspekciyası baslıqları)nıń xalıqtıń mashqalaların anıqlaw hám sheshiw sistemasınıń nátiyjeli islewin támiyinlew boyınsha bilim hám kónlikpelerin rawajlandırıw maqsetinde shólkemlestirildi.
Oqıw-ámeliy seminardı Ózbekstan Respublikası Bas ministri Abdulla Aripov kiris sózi menen ashıp berdi.
Senat Baslıǵı Tanzila Norboeva mámleketimiz basshısı tárepinen belgilep berilgen tiykarǵı wazıypalarǵa muwapıq, «máhálle jetiligi» jumısın jańa mexanizm tiykarında jolǵa qoyıw zárúr ekenligine itibar qarattı.
Orınlarda «Kámbaǵallıqtan abadanlıqqa qaray» baǵdarlaması sheńberinde ámelge asırılıp atırǵan jumıslardı jáne de jedellestiriw, máhálle kesiminde islesiwge juwapker basshılardıń jumısın nátiyjeli hám óz-ara birgelikte shólkemlestiriw hám olarda zárúr bilim, kónlikpelerdi qáliplestiriwde búgingi seminardıń áhmiyetine toqtap ótti.
Seminarda aymaqlardı ekonomikalıq rawajlandırıw hám xalıqtıń bántligin támiyinlew, «Kámbaǵallıqtan abadanlıqqa qaray» baǵdarlamasın ámelge asırıw, investiciya, eksport hám lokalizaciyalawdaǵı baslı máseleler boyınsha ámelge asırılatuǵın jumıslar haqqında maǵlıwmat berildi.
Migraciya processlerin tártipke salıw, jańa tártipke bola jer ajıratıw, máhállelerdegi bos obyektlerden nátiyjeli paydalanıw hám kadastr hújjetlerin rásmiylestiriw hám jol boyı aymaqlarında infrastrukturanı jaqsılaw, xalıqtı turaq jay menen támiyinlew haqqındaǵı jańalıqlar haqqında túsinik berildi.
Bunnan tısqarı, ilaj dawamında Qala qurılısı, qorshaǵan ortalıqtı qorǵaw, reformalardıń aymaqlardaǵı nátiyjeliligin hám lawazımlı shaxslardıń jumısında nızam ústinligin támiyinlew hám basqa da áhmiyetli temalarda ministrlik hám uyımlardıń basshıları, taraw qánigeleri tárepinen pikirlesiw túrinde bayanatlar shólkemlestiriledi.
Ortaǵa taslanǵan bul máseleler boyınsha sheshimler islep shıǵıw búgingi seminardıń tiykarǵı hám áhmiyetli táreplerinen biri bolıp esaplanadı.
N.Abduraimova, ÓzA