Shveycariyanıń Jeneva qalasında parlamentleraralıq awqam (PA)nıń 149-assambleyası dawam etpekte.
Onda qatnasıp atırǵan Senat Baslıǵı Tanzila Norboeva basshılıǵındaǵı Ózbekstan delegaciyası assambleya sheńberinde shólkemlestirilgen «Tınısh hám turaqlı keleshek ushın ilim, texnologiya hám innovaciyalardan paydalanıw» temasındaǵı debatqa shıqtı.
Onda Ózbekstan tárepinen sońǵı jıllarda ilimdi rawajlandırıwǵa qaratılǵan ámeliy jumıslar alıp barılıp atırǵanı, bul baǵdarda qısqa waqıt ishinde kóplegen xuqıqıy hújjetler qabıl etilgeni atap ótildi.
«Ózbekstan – 2030» strategiyasında zamanagóy texnologiyalardı jedel engiziw hám sanaattıń túrli tarmaqların sanlastırıw tiykarǵı baǵdarlar qatarında belgilep berilgeni atap ótildi.
Ámelge asırılıp atırǵan reformalardıń nátiyjesinde Ózbekstan 2023-jılı Global innovaciyalar indeksi reytinginde 2015-jılǵa salıstırǵanda 40 tekshege kóterilgeni ayrıqsha atap ótildi.
Debat dawamında delegaciyamız tárepinen keleshekte innovaciya tarawların xoshametlew hám parlamentlerdiń kadrlar potencialın arttırıw hám rawajlandırıw baǵdarında tájiriybe almasıw, ilim hám texnologiya tarawında global sóylesiwdi kúsheytiw baslamasın alǵa qoydı.
* * *
Jenevaǵa sapar sheńberinde Senat baslıǵı Tanzila Norboeva PA Bas xatkeri Martin Chungong menen ushırasıw ótkerdi.
Sóylesiwler dawamında Ózbekstan parlamentiniń PA menen birge islesiw qatnasıqları, keleshektegi rejeleri kórip shıǵıldı.
Sonıń ishinde, 2025-jılı Ózbekstanda bolıp ótetuǵın PAnıń 150-assambleyasına tayarlıq kóriw máseleleri dodalandı.
M.Chungong Ózbekstan qısqa waqıt ishinde úlken rawajlanıw nátiyjelerine eriskenin, Tashkentte PAnıń 150-yubiley assambleyasınıń ótkeriliwi nátiyjeli parlamentleraralıq birge islesiwdiń logikalıq dawamı bolatuǵının atap ótti.
Sóylesiw dawamında 150-assambleya tariyxıy áhmiyetke iye bolatuǵını, Ózbekstan parlamenti tájiriybesiniń úlgili táreplerin basqa mámleketlerge kórsetetuǵını atap ótildi.
Sonıń menen birge, Turaqlı rawajlanıw maqsetlerinde názerde tutılǵan gender teńlik, sociallıq qorǵaw, insan xuqıqların támiyinlew baǵdarında parlamenttiń tutqan ornın jáne de kúsheytiw máseleleri itibar orayında boldı.
N.Abduraimova, ÓzA