Ózbekstan Sawda-sanaat palatasında Qatar isbilermen toparı wákilleriniń qatnasıwında dógerek sáwbeti ótkerildi. Ushırasıwda palata baslıǵınıń orınbasarı Dilshod Rasulov hám usı arab mámleketi «Premium Constraction» kárxanasınıń wákili Nasri Al Saydiy qatnastı.
Qatar tárepi Prezident Shavkat Mirziyoev alıp barıp atırǵan ekonomikalıq reforomalardı joqarı bahalap, Ózbekstandı isenimli sherik sıpatında kóretuǵının jáne bir márte tastıyıqladı.
Ilaj sheńberinde Investiciyalar, sanaat hám sawda ministrligi janındaǵı Sırt el investiciyaların tartıw agentligi, «Óztoqımashılıqsanaatı», «Ózsanaatqurılısmaterialları» associaciyalarınıń wákilleri tárepinen mámleketimizdiń investiciyalıq potencialı hám isbilermenlerdiń keń perspektivası sáwlelengen prezentaciya ótkerildi.
Sóylesiw dawamında Qatar mámleketiniń isbilermenleri qızıǵıwshılıq bildirgen taraw hám baǵdarlar boyınsha zárúr maǵlıwmatlar, sorawlarǵa juwaplar berildi. Sawda-ekonomikalıq qatnasıqtı rawajlandırıwǵa qaratılǵan usınıslar kórip shıǵılıp, dodalandı.
Sonday-aq, 11-noyabr kúni Doxa qalasında bolıp ótetuǵın Isbilermenler keńesi májilisinde qatnasıw, Qatarda ózbek ónimleri ushın sawda úyi yamasa shourum orayın ashıwǵa kelisip alındı.
Qatar delegaciyası wákilleriniń Ózbekstanǵa saparı baǵdarlamasına muwapıq, Namangan wálayatına sapar da rejelestirilgen.

Muharrama Pirmatova, ÓzA