Prezident Shavkat Mirziyoevtiń basshılıǵında videoselektor májilisi dawam etpekte.
Ótken jılı Xalıq qabıllawxanalarına hákimlerdiń ózi basshı etip tayınlanǵan edi.
Qaraqalpaqstan, Ándijan, Qashqadárya, Xorezm, Sırdáryada basshılardıń ózi shuǵıllanǵanı sebepli aymaqtaǵı múrájatlar 25-30 procentke azayǵanı, xalıq kótergen máselelerdiń 60-70 procenti unamlı sheshilip atırǵanı atap ótildi. Biraq qalǵan hákimler hám ayırım ministrler ele bul baǵdarda keskin ózgeris islemegeni kórsetip ótildi.
Máselen, Tashkent qalasında 170 mıń hám Tashkent wálayatında 110 mıń múrájattıń yarımınan kóbi sheshimin tappaǵan. Surxandárya, Samarqand, Tashkent qalasında qaytadan múrájatlar kóbeygen.
Mısal ushın, puqara yanvar ayında mektep oqıwshısı Sergeliden aǵıp ótetuǵın “Junariq” kanalına túsip ketkenin aytıp, buzılǵan kópirdi qayta tiklewdi soraǵan. Bul máselege eki ay dawamında birde-bir juwapker itibar qaratpaǵan, múrájatqa júzeki juwap berilgen.
Jaǵday sociallıq tarmaqta tarqalǵannan keyin ǵana qarjı da tabılǵan, kópir de qurılǵan. Múrájatlar menen islesiwdegi bunday kemshilikler adamlardıń mámleketke bolǵan isenimine zıyan keltirip atırǵanı kórsetip ótildi.
Xalıq qabıllawxanalarına kelip túsip atırǵan múrájatlardıń úlken bólegi Ishki isler (148 mıń), Májbúriy orınlaw byurosı (134 mıń), Energetika (88 mıń), Bántlik (60 mıń) hám Densawlıqtı saqlaw ministrligine (56 mıń) tiyisli ekeni atap ótildi.
ÓzA