Málimleme mákanınıń jedel rawajlanıwı jurnalistika tarawına da jańa talap hám juwapkershiliklerdi júklemekte. Jámiyetlik turmısta ǵalaba xabar qurallarınıń ornı barǵan sayın artıp barar eken, ásirese, jas jurnalistlerdiń bilim hám potencialın rawajlandırıw, olardı qollap-quwatlaw áhmiyetli wazıypalardan birine aylanbaqta. Sebebi keleshek media mákanınıń kelbeti áyne búgingi jas jurnalistlerdiń kásiplik dárejesi, kózqarası hám intakerligine baylanıslı.
Ózbekstan Milliy baspasóz orayında “Jaslar kúni” sheńberinde Ózbekstan Jurnalistler awqamı basshılıǵınıń jas jurnalistler menen ashıqtan-ashıq sóylesiwi bolıp ótti. Bul ushırasıw jas jurnalistlerdi qollap-quwatlaw, olardıń kásiplik rawajlanıwı ushın jaratılıp atırǵan imkaniyatlar haqqında tolıq maǵlıwmat beriw jáne media tarawındaǵı áhmiyetli máseleler boyınsha pikir alısıw maqsetinde shólkemlestirildi.
Ilaj dawamında mámleketimizde jaslar siyasatı sheńberinde ámelge asırılıp atırǵan reformalar, jurnalistika tarawında jaslar ushın jaratılıp atırǵan sharayatlar hám keleshektegi joybarlar haqqında sóz boldı. Ásirese, jaslardıń dóretiwshilik baslamaların qollap-quwatlaw, olardıń kásiplik mamanlıǵın arttırıw hám zamanagóy jurnalistika talaplarına sáykes kadrlardı tayarlaw máseleleri dodalaw orayında boldı.
Ushırasıw dawamında jas jurnalistler Ózbekstan Jurnalistler awqamınıń basshılıǵına ózlerin qızıqtırǵan sorawlar menen múrájat etti. Sóylesiw dawamında jurnalistika tarawındaǵı perspektivalı joybarlar, media ortalıǵındaǵı jańa tendenciyalar, jas dóretiwshilerdi qollap-quwatlaw mexanizmleri hám birge islesiw imkaniyatları boyınsha pikir alısıldı. Bul bolsa ilajdıń tek ǵana málimleme beriw emes, al óz-ara tájiriybe almasıw maydanına aylanǵanın kórsetti.
Ilajda hár qıylı ǵalaba xabar qurallarında jumıs alıp barıp atırǵan jas jurnalistler hám jurnalistika baǵdarında oqıp atırǵan studentler qatnastı. Ashıqtan-ashıq sóylesiw dawamında jaslar tarawdaǵı bar mashqalalar, jańa imkaniyatlar hám perspektivalı ideyalar boyınsha óz pikir-usınısların bildirdi.
Búgingi kúnde jurnalist tek ǵana waqıyanı sáwlelendiriwshi emes, al jámiyette pikirdi qáliplestiriwshi, mashqalalarǵa sheshim izlewge túrtki beriwshi áhmiyetli shaxs esaplanadı. Sol sebepli jas jurnalistlerdiń kásiplik tayarlıǵı, sın kózqarastan pikirlewi hám sociallıq juwapkershiligi ayrıqsha áhmiyetke iye. Bunday ashıqtan-ashıq sóylesiwler bolsa jaslardıń taraw wákilleri menen tikkeley pikir alısıwı, tájiriybe arttırıwı hám óz jumısın jáne de rawajlandırıwına xızmet etedi.
Juwmaqlap aytqanda, mámleketimizde ámelge asırılıp atırǵan jaslar siyasatı jaslardıń baslamaların qollap-quwatlaw, olardıń jámiyettegi belsendiligin arttırıw hám hár qıylı tarawlarda, sonıń ishinde, ǵalaba xabar qurallarında da óz potencialın kórsetiwi ushın keń imkaniyatlar jaratpaqta. Jas jurnalistler menen ótkerilip atırǵan bunday ushırasıw hám sóylesiwler bolsa media tarawınıń keleshektegi rawajlanıwı ushın áhmiyetli tiykar bolıp xızmet etedi. Sebebi, belsendi, bilimli hám juwapkershilikli jas jurnalistler – jámiyettiń qalıs hám isenimli málimleme deregi.

Dildora DWSMATOVA,
ÓzAnıń xabarshısı