Iran áskerleri: urıs qashan tamamlanıwın biz sheshemiz
Iran Islam revolyuciyası qorǵawshıları korpusı Donald Tramptıń “urıs tez arada tamamlanıwı múmkin” degen bayanatına juwap retinde, urıs qashan tamamlanıwın ózleri sheshetuǵının málim etti. Bildiriwde sawash maydanındaǵı sharayatlar hám qararlar Irannıń qolında ekeni atap ótildi. Sonıń menen birge, Iran raketa soqqıların dawam ettiriwge tayar ekenin bildirdi hám AQSh penen jańa sóylesiwler házirshe kún tártibinde emes ekeni atap ótildi.
Ukraina Bryansktegi zavodqa Storm Shadow raketaları menen soqqı berdi
Ukraina Qurallı Kúshleri Rossiyanıń Bryansk qalasındaǵı “Kremniy El” mikroelektronika zavodına Storm Shadow qanatlı raketaları menen soqqı berdi. Huqıqıy dereklerge bola, hújimde altı adam qaytıs bolǵan, 37 adam jaraqatlanǵan. Ukraina tárepi bul soqqını Rossiyanıń áskeriy-ekonomikalıq potencialın azaytıw maqsetinde ámelge asırǵanın bildirdi hám operaciya videosın járiyaladı.
Qazaqstanlı shıpaker Nyu-York-Tashkent reysinde jolawshınıń ómirin saqlap qaldı
Ersin Junusov atlı qazaqstanlı shıpaker Nyu-York-Tashkent reysinde samolyot bortındaǵı jolawshıǵa qıstawlı medicinalıq járdem kórsetti. Nawqas kúshli taxikardiya hám joqarı qan basımı menen awırlasqanda, shıpaker shama menen 10 saat dawamında onıń jaǵdayın baqladı, kislorod jalǵandı hám zárúr dáriler berildi.
Qazaqstan Rossiyadan kóship kelgen ayırım puqaralardı deport etiwi múmkin
Qazaqstan Milliy qáwipsizlik komiteti waqtınsha jasaw ruqsatnamaların qálbekilestiriwge baylanıslı iri jınayat isin tergew etpekte. Meduza xabarına bola, is Rossiyadan kóship kelgen ayırım shaxslardıń deportaciyasına alıp keliwi múmkin. Qánigeler bul jumıstıń artında migraciya siyasatın qatańlastırıw hám itimallı ǵalabalıq deportaciya tayarlanıp atırǵanın aytpaqta.
BioNTech tiykarın salıwshıları jańa kompaniya shólkemlestiretuǵının járiyaladı
Ugur Shaxin hám Ózlem Turechi Germaniyanıń BioNTech kompaniyasındaǵı basshılıq lawazımlarınan bosap, mRNK texnologiyası boyınsha izertlewler alıp baratuǵın jańa kárxana shólkemlestiretuǵının málim etti. Reuters xabarına bola, erli-zayıplı ilimpazlar BioNTech‘te klinikalıq basqıshqa qaratılǵan izertlewler ornına baslanǵısh ilimiy izertlewlerge itibar qaratıwdı rejelestirmekte.
G7 házirshe strategiyalıq neft rezervlerinen paydalanbaydı
G7 mámleketleri hám Xalıqaralıq energetika agentligi (XEA) jáhán neft bazarındaǵı jaǵdaydı bahaladı, biraq házirshe strategiyalıq neft rezervlerin bazarǵa shıǵarıw ilajı qollanılmaydı. Dereklerge bola, XEAǵa aǵza 32 mámleket qolında 1,2 milliard barrelden aslam strategiyalıq neft rezervi bar. Sonıń menen birge, agentlik tariyxtaǵı eń iri rezerv shıǵarıw variantın da kórip shıqpaqta.
Qaraqalpaqstan xabar agentligi