Mámleketimizde alıp barılıp atırǵan aqılǵa uǵras siyasat sebepli dúnya jámiyetshiliginiń elimizge bolǵan isenimi barǵan sayın artıp barmaqta. Tarawlar kesiminde ornatılıp atırǵan birge islesiwler pikirimizdiń ayqın kórinisi bolıp esaplanadı.
Qıtaydıń abıraylı joqarı bilimlendiriw mákemeleri – Fudan universitetiniń professorı Van Syaolin hám Pekin pedagogikalıq universitetiniń professorı CHjan Si basshılıǵındaǵı delegaciya Ózbekstan Máhálleleri associaciyasında kámbaǵallıqtı qısqartıw boyınsha 2025-jılı alıp barılǵan izertlew nátiyjelerin usındı.
Ushırasıwda Ózbekstan Respublikası Prezidenti janındaǵı Mámleketlik siyasat hám basqarıw akademiyasınıń prorektorı Raima Shirinova hám bir qatar ministrlikler menen vedomstvolardıń wákilleri qatnastı.
Sóylesiw dawamında Qıtay tájiriybesin ilimiy jaqtan tallaw hám onı jergilikli basqarıw sistemasında qollanıw imkaniyatları dodalandı.
Tárepler Ózbekstan Máhálleleri associaciyası, Mámleketlik siyasat hám basqarıw akademiyası hám Ózbekstan Milliy universiteti menen birgelikte usı jıldıń may ayında “Eń jaqsı húkimet – eń jaqsı basqarıw” temasında xalıqaralıq konferenciya ótkeriw, sonday-aq, qospa ilimiy izertlewler hám tájiriybe arttırıw baǵdarlamaların jolǵa qoyıw boyınsha kelisimge eristi.
Keleshektegi birge islesiwler doslıq baylanıslardı jáne de bekkemlewge hám mámleketlerdiń rawajlanıwına múnásip úles qosatuǵını atap ótildi.

Sherbek Islomov, ÓzA