Oliy Majlis Nızamshılıq palatasınıń májilisinde bir topar deputatlardıń baslaması menen kirgizilgen xalıq deputatları Keńesleri jumısınıń nátiyjeliligin bunnan bılay da arttırıwǵa qaratılǵan nızam joybarı ekinshi oqıwda statyama-statya kórip shıǵıldı.
Bul másele boyınsha komitet baslıǵı Gulruh Azamova tolıq maǵlıwmat berdi:
– Bul nızam joybarı menen xalıq deputatları jergilikli Keńesi baslıǵınıń orınbasarı institutın engiziw, oǵan bir waqıttıń ózinde Keńes sekretariatınıń baslıǵı wazıypasın atqarıw hám Keńes sekretariatınıń xızmetkerlerin lawazımǵa tayınlaw hám lawazımınan bosatıw wákilliklerin beriw názerde tutılmaqta.
Sonday-aq, jergilikli Keńeslerdiń jumısın nátiyjeli shólkemlestiriw maqsetinde jergilikli Keńesler sessiyalarınıń kún tártibi joybarın qáliplestiriw hám olardı shaqırıw, turaqlı komissiyalardıń jumısın muwapıqlastırıw hám basqa da shólkemlestiriwshilik wákilliklerge iye Keńes Prezidiumı institutı engizilip, onıń jumıs tártibi belgilenbekte.
Keńes baslıǵı hám onıń orınbasarı jámiyetlik tiykarda jumıs alıp barıwı belgilenbekte. Keńes sessiyalarında Keńes baslıǵı bolmaǵan jaǵdayda onıń orınbasarı basshılıq etiwi belgilenbekte.
Xalıq deputatları Keńeslerinde jergilikli atqarıwshı hákimiyat uyımları basshılarınıń ayırım áhmiyetli sociallıq máseleler boyınsha málimlemelerin tıńlaw boyınsha “Keńes saatı” institutı engizilmekte. Aymaqqa baylanıslı máseleler boyınsha jergilikli atqarıwshı hákimiyat uyımları basshılarınıń málimlemesin tıńlawda lawazımlı shaxslar deputatlardıń sorawlarına juwap beriwi belgilenbekte.
Deputatlar tárepinen nızam joybarın bunnan bılay da jetilistiriw boyınsha bir qatar usınıslar berildi. Ótken dáwirde juwapker komitette bul usınıslar hár tárepleme tallanıp, olardıń tiykarlı dep tabılǵanları hújjet tekstinde sáwlelendirildi.
Nızam joybarınıń qabıl etiliwi xalıq deputatları Keńesleriniń jumısın nátiyjeli shólkemlestiriw hám orınlarda Keńeslerdiń qadaǵalaw jumısın jetilistiriwge xızmet etedi. Jergilikli mámleketlik hákimiyat jumısınıń nátiyjeliligin támiyinleydi, – dedi Gulruh Azamova.
Dodalawlarda kóterilgen sorawlarǵa tiyisli juwaplar berildi hám nızam joybarı deputatlar tárepinen ekinshi oqıwda qabıl etilip, Senatqa jiberildi.
Muhtarama Komilova, ÓzAnıń xabarshısı