AQShtıń Nyu-York qalasında BMSh Hayal-qızlar jaǵdayı boyınsha komissiyanıń 70-yubiley sessiyası bolıp ótpekte.
Onda Ózbekstan delegaciyası da qatnaspaqta. Delegaciya quramında senator Gulnora Marufova, Joqarǵı sud baslıǵınıń orınbasarı Malika Qalandarova, Shańaraq hám hayal-qızlar komiteti baslıǵınıń orınbasarı Mukarram Nurmatova hám Insan huqıqları boyınsha Milliy oray direktorınıń orınbasarı Dilnoza Murodova bar.
Abıraylı forumda BMShqa aǵza mámleketlerdiń parlament aǵzaları, xalıqaralıq shólkemler hám puqaralıq jámiyetiniń wákilleri qatnaspaqta.
Hayal-qızlardıń ádil sudlawdan paydalanıw imkaniyatların keńeytiw, hayal-qızlardıń siyasat hám ekonomikadaǵı qatnasıwın keńeytiw, zorlıqqa qarsı gúresiw, sonday-aq, sanlı texnologiyalar hám jasalma intellekttiń hayal-qızlar huqıqlarına tásiri BMSh yubiley sessiyasınıń tiykarǵı temasına aylandı.
Sessiyanıń saltanatlı ashılıw máresiminde BMSh Bas xatkeri Antoniu Guterrish hayal-qızlar huqıqları tarawındaǵı birde-bir jetiskenlik óz-ózinen payda bolmaytuǵının – hár bir alǵa taslanǵan qádem belsendiler, huqıq qorǵawshılar hám jámiyetlik háreketlerdiń uzaq dawam etken gúresi nátiyjesi ekenin ayrıqsha atap ótti.
“BMSh-hayal-qızlar” strukturasınıń atqarıwshı direktorı Sima Baxus óziniń shıǵıp sóylewinde gender teńlikti qollap-quwatlawshı mámleketlerdiń húkimetleri hám shólkemleri jaǵdaydı jaqsı tárepke ózgertiw hám adamlardıń turmısın jaqsılaw ushın jeterli dárejede kúshli tásirge iye ekenin atap ótti.
Ánjuman sheńberinde barlıq hayal-qızlardıń ádil sudlawǵa bolǵan huqıqın támiyinlew hám keńeytiwge qaratılǵan nızamlarǵa itibar qaratıldı. Bul, birinshi gezekte, kemsitiwshi nızamlar, siyasat hám ámeliyatlardı saplastırıw jáne sistemalı tosqınlıqlardı saplastırıw arqalı inklyuziv hám ádil huqıqıy sistemalardı qáliplestiriwdi óz ishine aladı.
Ózbekstan delegaciyası ádil sudlawǵa erisiw imkaniyatların keńeytiw, kemsitiwshi nızamlar, siyasat hám ámeliyatlardı saplastırıw, sistemalı tosqınlıqlardı saplastırıwǵa baǵıshlanǵan joqarı dárejedegi interaktiv sóylesiwde de qatnastı.
N.Abduraimova, ÓzA