Prezident Shavkat Mirziyoevqa neft hám gaz tarawında belgilengen wazıypalardıń orınlanıw jaǵdayı boyınsha esabat berildi.
Bizge belgili, usı jıldıń 30-yanvar kúni “Ózbekneftgaz” akcionerlik jámiyetiniń jumıs nátiyjeliligin arttırıw, uglevodorod rezervlerin keńeytiw hám tarmaqtı zamanagóy texnologiyalar tiykarında rawajlandırıw boyınsha tiykarǵı wazıypalar belgilengen edi. 23-fevral kúni bolsa bul tapsırmalardıń dáslepki orınlanıwı kórip shıǵılıp, bir qatar qosımsha tapsırmalar berilgen edi.
Bul retki prezentaciyada usı ilajlardı ámelge asırıw procesi jáne bir márte tallandı.
Neft hám gaz tarawında geologiyalıq-izlew jumısların keńeytiw, jańa kánlerdi anıqlaw, bar qudıqlardıń nátiyjeliligin arttırıw hám qazıp shıǵarıw kólemin turaqlastırıwǵa ayrıqsha toqtap ótildi.
Bul baǵdarda taraw basshılarınıń usı jıldıń basınan 3D seysmikalıq izlew jumısları 471 kvadrat kilometr kólemde ámelge asırılǵanı, 11 jańa qudıq iske qosılǵanı, 20 qudıqta ońlaw jumısları orınlanǵanı hám 5 texnologiyalıq ilaj ámelge asırılǵanı haqqındaǵı málimlemesi kórip shıǵıldı.
Sonıń menen birge, tarawda operaciyalıq nátiyjelilikti arttırıw, kárxanalardıń qárejetlerin optimallastırıw hám finanslıq turaqlılıǵın bekkemlew boyınsha jumıslarǵa ayrıqsha itibar qaratıldı.
Mámleketimiz basshısı belgilengen wazıypalar hám rejelestirilgen ilajlardıń orınlanıwın anıq esap-sanaq hám qatań tártip tiykarında támiyinlewdi dawam ettiriw boyınsha juwapkerlerge tapsırmalar berdi.

ÓzA