Prezidentimizdiń tapsırması menen elimizde xalıqtı qıynap kelgen máselelerge sheshim tabıw, olardıń turmıslıq máselelerin, infrastruktura menen baylanıslı mashqalaların saplastırıw boyınsha jumıslar sistemalı túrde dawam ettirilmekte.
Usınday iygilikli jumıslardıń dawamı sıpatında búgin Nókis qalasındaǵı “Isbilermenler aymaǵı” máhállesinde keń kólemli abadanlastırıw jumısları baslap jiberildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, awır sharayattaǵı bul máhállede qurılıs-ońlaw hám abadanlastırıw jumıslarınıń alıp barılıwında barlıq basshı awızbirshilikli túrde úles qosıwı kerek ekenligin atap ótti.
Sonı da ayrıqsha aytıw kerek, rejedegi jumıslar sheńberinde ishki jollar ońlanadı, ishimlik suw, elektr, gaz tarmaqları menen baylanıslı máselelerge sheshim tabıladı, járdemge mútáj puqaralardıń turaq jayların ońlaw ilajları kóriledi. Aymaqta jańa isbilermenlik subektlerin shólkemlestiriw, puqaralardıń qosımsha dáramat alıwına járdemlesiw jumısları alıp barıladı. Bul arqalı, aymaq turǵınların qıynap kelgen mashqalalarǵa sheshim tabıladı.
Búgingi baslanıp atırǵan jumıs basında mákeme-shólkem basshılarına wazıypalar bólistirilip, aldaǵı rejeler belgilep alındı.

Qaraqalpaqstan xabar agentligi