Ózbekstan Respublikası Prezidentiniń qararı

Elimizde ámelge asırılıp atırǵan keń kólemli reformalar sebepli insan qádiri, onıń huqıqları menen máplerin támiyinlew, xalqımızdıń abadanlıǵın arttırıw, jámiyette tınıshlıq, doslıq hám awızbirshilik ortalıǵın, sociallıq ádillik principlerin bekkemlew jolında úlken qádemler taslanbaqta. Bulardıń barlıǵı áyyemgi tariyx hám dástúrlerge iye bolǵan shıǵısqa tán jańa jıl bayramı – Nawrızdıń adamgershilik mánisi, onıń keńpeyillik, saqawat hám miyrim-shápáát sıyaqlı ázeliy qádiriyatlarınıń áhmiyetin jáne de joqarılatpaqta.
Sońǵı jılları Jańa Ózbekstanda ámelge asırılıp atırǵan shın mánisindegi tariyxıy ózgerislerge sáykes túrde, mánis-mazmunı barǵan sayın tereńlesip atırǵan Nawrız áyyyamın barlıq qala hám awıllarımızda, pútkil elimizde ulıwmaxalıqlıq seyil sıpatında, joqarı shólkemlestiriwshilik dárejede hám kóterińki ruwxta belgilew maqsetinde qarar etemen:
1. 2026-jılǵı Nawrız ulıwmaxalıqlıq bayramına tayarlıq kóriw hám onı ótkeriw boyınsha shólkemlestiriw komitetiniń (keyingi orınlarda – Shólkemlestiriw komiteti) quramı qosımshaǵa muwapıq tastıyıqlansın.
2. Shólkemlestiriwshi komitet (A.Aripov) bir hápte múddette:
a) Respublikalıq Ruwxıylıq hám aǵartıwshılıq orayı, Mádeniyat ministrligi, Jaslar isleri agentligi, Ózbekstan Jazıwshılar awqamı, Ózbekstan máhálleleri awqamı hám “Nuranıy” qorınıń usınısına bola Nawrız ulıwmaxalıqlıq bayramınıń ideyalıq mazmunın kúsheytiwge baylanıslı koncepciyanı (keyingi orınlarda – Koncepciya) tastıyıqlasın;
b) Tashkent qalası, Qaraqalpaqstan Respublikası hám wálayatlar orayları, barlıq qala hám rayonlar, awıllarda Nawrız ulıwmaxalıqlıq bayramın múnásip belgilew boyınsha “Nawrızdı ulıǵlaw – insandı ulıǵlaw!” degen iygilikli ideyanı ózinde jámlegen shólkemlestiriwshilik-ámeliy, mádeniy-ruwxıy hám úgit-násiyatlaw ilajlarınıń baǵdarlamasın tastıyıqlasın hám onıń ámelge asırılıwın támiyinlesin.
3. Orınlarda Nawrız ulıwma xalıqlıq bayramına baǵıshlanǵan barlıq ilajlardı Konceptte bayan etiletuǵın tiykarǵı baǵdar hám usınıslarǵa muwapıq joqarı dárejede shólkemlestiriw, olarda watanlaslarımızdıń belsene qatnasıwın támiyinlew maqsetinde tómendegi máselelerge ayrıqsha itibar qaratılsın:
a) bayram ilajların turmıstıń oyanıwı, insan hám tábiyat arasındaǵı únleslik, ana jerge mehir hám itibardı sáwlelendiretuǵın, watanlaslarımızdı tınısh hám paraxat turmısımızdı qádirlep, suw hám jer resurslarınan aqılǵa uǵras paydalanıp, shúkirshilik sezimi menen jasawǵa shaqıratuǵın tásirsheń mazmun hám formada ótkeriw;
b) mámleketimizde ámelge asırılıp atırǵan túpkilikli demokratiyalıq reformalar, xalqımızdıń kúndelikli turmısında, sana-sezimi hám dúnyaqarasında júz berip atırǵan unamlı ózgerisler, óz-ara birlik hám awızbirshilik pazıyletleri ásirese Nawrız kúnlerinde ayqın kórinetuǵının úgit-násiyatlaw;
v) bıyılǵı Nawrız múbárek Ramazan hayıtı bayramı menen únles túrde belgileniwi onıń insanıylıq principlerin jáne de kúsheytetuǵının esapqa alıp, kekse áwlad wákillerin, atap aytqanda, Ekinshi jer júzilik urıs qatnasıwshıları hám miynet frontı veteranların hár tárepleme qádirlew, “Mehribanlıq,” “Saqawat” hám “Múriwbet” úylerinde jasap atırǵan shaxslar, sociallıq qorǵaw dápterlerine kirgizilgen hám járdemge mútáj insanlardıń halınan xabar alıw, olar ushın bayram dasturxanların shólkemlestiriw jáne hár qıylı qayırqomlıq ilajların máhálle belsendileri, jaslar hám hayal-qızlar wákilleriniń qatnasıwında shólkemleskenlik penen ótkeriw;
g) “Jasıl mákan” ulıwma milliy joybarı sheńberinde belgilengen ilajlardı ámelge asırıw, bayram aldınan barlıq aymaqlarda, kóshe hám maydanlarda, máhálle, rayon hám qalalarda abadanlastırıw hám kóklemzarlastırıw ilajların ótkeriw, “Men de nál ekemen” akciyaların, ulıwma xalıqlıq shembiliklerin shólkemlestiriw;
d) jámiyetimizde húkim súrip atırǵan milletleraralıq doslıq hám tatıwlıq ortalıǵın bekkemlew maqsetinde elimizde jasap atırǵan túrli millet hám xalıq wákilleriniń milliy úrp-ádetleri, dástúrleri hám qádiriyatların keńnen kórsetiw;
j) bayram ilajları dawamında ónermentshilik kórgizbeleri, milliy sport túrleri boyınsha jarıslar ótkeriw, kitap kórgizbeleri, arzanlastırılǵan awıl xojalıǵı hám azıq-awqat ónimleri yarmarkaları, kóshpeli sawda dúkánların shólkemlestiriw, báhárgi taǵamlardı tayarlaw hám bul baǵdarda kórgizbeli sawda hám tańlawlardı shólkemlestiriw;
z) barlıq qala hám awıllarda ótkeriletuǵın bayram saltanatlarında, ǵalaba xabar qurallarında Nawrız bayramınıń tariyxı, hár bir aymaqta onı belgilewge baylanıslı úrp-ádet hám dástúrlerdi keńnen sáwlelendiriw;
i) Tashkent qalasındaǵı “Jańa Ózbekstan” kompleksinde ayrıqsha baǵdarlama tiykarında xalıq seyillerin shólkemlestiriw.
4. Mádeniyat ministrligi (O.Nazarbekov) Respublikalıq Mánawiyat hám aǵartıwshılıq orayı (O.Xasanov), Ózbekstan Jazıwshılar awqamı (S.Saidov) menen birgelikte bir hápte múddette Koncepciyaǵa muwapıq Tashkent qalasında Nawrız bayramına baǵıshlap ótkeriletuǵın teatrlastırılǵan tiykarǵı koncert tamashasınıń baǵdarlamasın islep shıqsın.
5. Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri:
a) bir hápte múddette Nawrız ulıwma xalıqlıq seyillerin ótkeriw boyınsha tómendegilerdi názerde tutatuǵın aymaqlıq ilajlar baǵdarlamaların islep shıqsın hám tastıyıqlasın:
i) ulıwma xalıqlıq seyiller shólkemlestiriletuǵın tiykarǵı maydanlar, kóshe hám qıyabanlardı bayramǵa say bezew;
ii) seyil hám tamashalardı jergilikli tájiriybeli scenaristler hám rejissyorlar, kompozitorlar, baletmeysterler, saxna xudojnikleri, talantlı jas atqarıwshılar, folklor kórkem óneri wákilleri menen birgelikte joqarı kórkemlik dárejede tayarlaw ilajların kóriw;
iii) bayram ilajları sheńberinde hár bir aymaqqa tán bolǵan xalıq oyınları, tamashalar, kórgizbeler ótkerip, báhár taǵamları satılatuǵın ashıq asxanalar shólkemlestiriw;
b) bayram baǵdarlamaların hám ǵalabalıq tamashalardı tayarlawda, kósheler, maydan hám parklerdi bezewde maman qánigelerden ibarat dóretiwshilik toparlardı keńnen tartsın;
v) barlıq ilajlar jámiyetlik qáwipsizlik talaplarına qatań ámel etken halda ótkeriliwin támiyinlesin.
6. Ótkeriletuǵın bayram ilajlarınıń qárejetleri:
a) Tashkent qalasında – respublikalıq byudjet hám Tashkent qalası jergilikli byudjeti qarjıları esabınan teń úleslerde;
b) Qaraqalpaqstan Respublikası hám wálayatlarda – tiyisli jergilikli byudjetler hám qáwenderlik qayırqomlıqları esabınan qaplanadı.
7. Ózbekstan Milliy málimleme agentligi, Ózbekstan Milliy teleradiokompaniyası, “Dunyo” málimleme agentligi hám basqa da ǵalaba xabar qurallarına Nawrız ulıwmaxalıqlıq bayramına tayarlıq kóriw hám onı ótkeriw boyınsha ámelge asırılıp atırǵan jumıslardı hár tárepleme sáwlelendirip barıw usınıs etilsin.
Usı qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa júklensin.

Ózbekstan Respublikası
Prezident Sh.MIRZIYoEV
Tashkent qalası,
2026-jıl 6-mart