Prezident hám qánigelestirilgen mekteplerdiń aldınǵı tájiriybelerin ulıwma bilimlendiriw mákemelerine engiziw, bilimlendiriwdiń sapasın bunnan bılay da arttırıw hám pedagoglar arasında tájiriybe almasıwdı shólkemlestiriw maqsetinde Nókis qalasındaǵı Prezident mektebinde “Ashıq esikler kúni” ilajı ótkerildi.
Ilajda Qaraqalpaqstan Respublikası Pedagogikalıq sheberlik orayınıń direktorı G.Kojabaeva, professor-oqıtıwshılar hám oray tıńlawshıları qatnastı.
Ilaj dawamında Prezident mektebi oqıwshıları tárepinen tayarlanǵan hár qıylı innovaciyalıq joybarlardıń prezentaciyası ótkerildi. Oqıwshılar óz joybarlarınıń mazmun-mánisi, maqseti hám áhmiyeti haqqında túsinikler berip ótti.
Sonday-aq, ilaj qatnasıwshıları mekteptiń zamanagóy materiallıq-texnikalıq bazası, laboratoriyaları, oqıw xanaları, kitapxanası hám oqıwshılar ushın jaratılǵan sharayatlar menen jaqınnan tanıstı.
“Ashıq esikler kúni” ilajında qatnasıwshılar Prezident mekteplerindegi aldınǵı tájiriybelerdi úyreniw, pikir alısıw, kórgenlerin ulıwma bilim beriw mekteplerinde de qollanıw boyınsha jańa ideyalarǵa iye bolıp, ilaj dawamında ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.