Insaniyat tariyxında áyyemgi dáwirlerden berli hayal-qızlarǵa ayrıqsha húrmet kórsetilip kelingen. Sebebi, hayallar tek ǵana turmısımız gúltajı emes, al erteńgi kúnimizdiń dawamshıları, keleshek áwladtıń dóretiwshileri bolıp esaplanadı.

Elimizde húrmetli apa-qarındaslarımızdıń bayramı ulıwmaxalıqlıq bayram sıpatında shıǵıs úrp-ádetleri, xalqımızdıń milliy qádiriyat hám dástúrleri tiykarında belgilenedi. Bayram múnásibeti menen hayal-qızlarǵa joqarı húrmet kórsetiledi. Usınday húrmetke erisken hayal-qızlarımızdan biri Nókis qánigelestirilgen mádeniyat mektebiniń oqıtıwshısı Yulduzxan Atadjanova. Ol jaqında 8-mart – Xalıqaralıq hayal-qızlar kúni múnásibeti menen Ózbekstan Respublikası Prezidenti tárepinen “Shuhrat” medalı menen sıylıqlandı.

Ol óziniń 43 jıllıq nátiyjeli miyneti, bay bilim hám tájiriybesi menen mámleketimizde alıp barılıp atırǵan keń kólemli reformalar procesinde belsene qatnasıp, óziniń pedagogikalıq jumısı dawamında kóplegen shákirtlerin ana Watanǵa muhabbat, milliy hám ulıwma insanıylıq qádiriyatlarǵa húrmet ruwxında tárbiyalawǵa úlken úles qosqan ustaz sıpatında usı joqarı húrmetke múnásip dep tabıldı.

Yu.Atadjanovanıń oqıtıwshıları Ózbekstan Respublikası hám Qaraqalpaqstan Respublikası kólemindegi tańlawlarda belsene qatnasıp, sıylı orınlardı iyelep kelmekte.

Ol bir neshe márte Ózbekstan Respublikası hám Qaraqalpaqstan Respublikası Mádeniyat hám sport isleri ministrliginiń “Húrmet jarlıǵı,” diplomı, Qaraqalpaqstan Respublikası Rus mádeniyat orayınıń “Húrmet jarlıǵı,” 2013-jılı bolsa, Balalar muzıka hám kórkem óner mektepleri oqıwshılarınıń “Akademik saz ásbapları hám estrada atqarıwshılıǵı” respublikalıq tańlawında “Húrmet jarlıǵı” menen sıylıqlandı. Sonday-aq, 2014-jılı “Etirof–2014” tańlawında Yulduzxan Atadjanova “Jıldıń eń jaqsı koncertmeystri” nominaciyası jeńimpazı boldı.

Yu.Atadjanova búgingi kúnde Nókis qánigelestirilgen mádeniyat mektebiniń koncert baǵdarlamalarında, Berdaq atındaǵı muzıkalı teatrındaǵı “Qayın ene,” “Ólim jazası,” “Alpamıs,” “Tirsekler,” “Xujdan,” “Súymegenge súykenbe” muzıkalı dramaları hám S.Yudakovtıń “Maysaranıń isi” komediyalıq operalarında xor bolıw menen birge, Qaraqalpaqstan Respublikası kóleminde ótkerilip atırǵan úlken koncertlerde K.Serjanov, R.Kutekeeva, E.Aytniyazova, D.Xojambergenov, U.Temirxanov, A.Kallıev, B.Uzaqbergenov, J.Sultabaev, J.Piyazov hám basqada kóplegen belgili qosıqshılar, Q.Zaretdinov, N.Muxammetdinov, Sh.Paxratdinov, T.Esirkepov, U.Abdullaevalar sıyaqlı kompozitorlar menen birgelikte dóretiwshilik jumıslar alıp barmaqta.

Yulduzxan Atadjanova házirgi kúnde Nókis qánigelestirilgen mádeniyat hám kórkem óner mektebinde “Fortepiano qánigeligi” oqıtıwshısı bolıp islemekte.

Hayal ázelden mehir-múriwbet hám sadıqlıq tımsalı bolıp kelgen. Insan, shańaraq, hayal túsiniklerin bir-birinen ajıralǵan halda kóz aldımızǵa keltirip bolmaydı. Shańaraqtı da, jámiyetti de birlestirip, oǵan qut-bereket kirgizetuǵın, shańaraqlarımızdı mehir-muhabbat, gózzallıq, jaqsılıq nurı menen nurlandıratuǵın insanlar da tiykarında húrmetli analarımız, mehriban apa-qarındaslarımız bolıp esaplanadı. Mine, usınday insanlardıń biri Yulduzxon Atadjanovanı da gózzallıq áyyyamı bolǵan bayram menen qutlıqlap, olarǵa uzaq ómir, shańaraqlıq baxıt-ıǵbal, báhárgi keypiyat joldas bolıwın tilep qalamız. Erisken jetiskenlikleri dawamlı bolsın, deymiz.

Qaraqalpaqstan xabar agentligi.