Gripp hám ótkir respirator viruslı infekciyalar dúnya xalqınıń salamatlıǵı ushın eń qáwipli qáwiplerden biri bolıp esaplanadı. Hár jılı mıńlaǵan insanlar viruslı kesellikler menen kesellenedi. Ásirese, gúz hám qıs máwsiminde bunday infekciyalar tez tarqaladı.
Ózbekstanda medicina hám farmacevtika tarawında bul baǵdarda ilimiy izleniwler alıp barılmaqta. Usı baǵdardaǵı áhmiyetli ilimiy qollanbalardan biri Ózbekstan Ilimler akademiyası Polimerler ximiyası hám fizikası institutınıń ilimpazları tárepinen jaratılǵan jańa virusqa qarsı preparat bolıp esaplanadı. Ilimpazlar tárepinen islep shıǵılǵan “CelAgrip” preparatı viruslarǵa qarsı aktivlikke iye bolıp, interferon induktorı sıpatında bahalanbaqta.
“CelAgrip” preparatı organizmge tikkeley virusqa qarsı tásir kórsetiwge qaraǵanda, insannıń immun sistemasın jedellestiriw arqalı qorǵanıwdı kúsheytedi. Yaǵnıy, preparat organizmde interferonlar islep shıǵarılıwın xoshametleydi. Interferonlar bolsa viruslarǵa qarsı tábiyǵıy qorǵaw wazıypasın atqarıwshı áhmiyetli beloklardan bolıp esaplanadı.
Nátiyjede organizm virus penen gúresiwge aldınnan tayar jaǵdayǵa keledi. Bul bolsa keselliktiń awır ótiwin azaytıw, organizmniń qarsılıq kúshin arttırıw hám infekciyalardıń rawajlanıw itimalın azaytıwǵa xızmet etedi. Házirgi kúnde, “CelAgrip” dári quralınıń barlıq normativlik-texnikalıq hújjetleriniń joybarları tayarlanǵan.
Viruslı keselliklerdiń keń tarqalıwı sharayatında profilaktika hám immunitetti bekkemlewge qaratılǵan preparatlar ayrıqsha áhmiyetke iye. “CelAgrip” sıyaqlı interferon induktorları organizmniń tábiyǵıy qorǵanıw sistemasın jedellestiriw arqalı keselliklerge qarsı gúresiwde nátiyjeli qural bolıwı múmkin.
Bunnan tısqarı, bunday ilimiy qollanbalar xalıqtıń salamatlıǵın bekkemlew hám zamanagóy farmacevtika ónimlerin jaratıwda áhmiyetli orın ieleydi.
Ózbekstan ilimpazları tárepinen jaratılǵan “CelAgrip” preparatı viruslı infekciyalarǵa qarsı gúresiwde perspektivalı ilimiy qollanbalardan biri sıpatında bahalanbaqta.
Ilimiy izleniwler tiykarında jaratılıp atırǵan bunday dári quralları densawlıqtı saqlaw sistemasın rawajlandırıw, xalıqtıń salamatlıǵın qorǵaw hám milliy ilim potencialın kórsetiwde áhmiyetli qádem bolıp xızmet etedi.

Dildora DWSMATOVA,
ÓzAnıń xabarshısı