Muzey fondında Tók qaladan tabılǵan naǵıslı ossuariy saqlanadı. Ol orta ásirlerge tiyisli Xorezm jerlew mádeniyatınıń bizge jetip kelgen siyrek ushırasatuǵın hám túp nusqa esteligi bolıp tabıladı.
Bul estelik tórt ayaqlı qaqpaqqa iye bolǵan, tuwrı tórt múyeshli formadaǵı gips súyek salǵısh bolıp, Afriǵiyler dáwiri kórkemlik dástúrleri tiykarında jaratılǵan. Onıń sırtında qaqpaq hám astınǵı bólegin birden-bir kompoziciyaǵa birlestirgen tariyxıy kóp reńli súwretlew naǵısı saqlanıp qalǵan.
Súwrette marhum hayaldı azalaw saxnası sáwlelengen. Orayda jerlew tóseginde hayal súwreti súwretlengen, eki tárepinde bolsa máresim dástúrlerine bola kókiregine urıp atırǵan azalawshılar kórsetilgen. Joqarǵı bóliminde óz aldına sáwlelengen arxitekturalıq qurılma ápiwayılastırılǵan túrde súwretlengen bolıp, onıń joqarısında yarım ay hám onıń ústinde dóńgelek simvol súwretlengen, tómengi tárepinde bolsa qurbanlıq qutısı yamasa tútetkish ıdısı sáwlelengen.
Tómengi bólimindegi naǵıslı friz kompoziciyanı juwmaqlaydı.
Bul ossuariy – basqalarına uqsamaytuǵın, hesh qanday stilge de salıp islenbegen, tek ǵana óz dáwiriniń janlı kórinisin saqlap qalǵan haqıyqıy tariyxıy artefakt bolıp esaplanadı.

Qaraqalpaqstan xabar agentligi