Nókis rayonında bilimlendiriw tarawı boyınsha májilis bolıp ótti. Onda rayon hákimi Z.Zaytov mektep direktorları hám mektepke shekemgi bilimlendiriw shólkemleriniń basshıları menen ushırastı. Ushırasıwda aymaqta bilimlendiriwdiń sapasın bunnan bılay da arttırıw, jas áwladqa zamanagóy bilim beriw máseleleri hár tárepleme dodalandı.
Ushırasıw dawamında Nókis rayonındaǵı ulıwma orta bilim beriw mektepleri hám mektepke shekemgi bilimlendiriw shólkemlerinde tálim-tárbiya procesin jańa basqıshqa alıp shıǵıw, ásirese, anıq hám tábiyǵıy pánler boyınsha jumıs alıp barıp atırǵan pedagoglardıń mamanlıǵın arttırıw, innovaciyalıq oqıtıw usılların engiziw máselelerine ayrıqsha itibar qaratıldı.
Sonday-aq, ulıwma orta bilim beriw mektepleri hám mektepke shekemgi bilimlendiriw shólkemleriniń basshıları tárepinen zamanagóy metodikalıq qatnasıqlardan nátiyjeli paydalanıw, oqıwshılardıń qábiletin anıqlaw hám rawajlandırıw, olardı kásipke baǵdarlaw boyınsha ámeliy usınıslar bildirildi.
Ushırasıw juwmaǵında rayon hákimi hár bir mektep jámááti jaslardıń bilim alıwı, erkin pikirlewi hám keleshekte múnásip kásip iyesi bolıp jetilisiwi ushın bar kúsh-ǵayratın jumsaw kerekligi atap ótildi. Usınday ushırasıwlar turaqlı túrde shólkemlestirip, orınlarda bar mashqalalardı qısqa múddetlerde saplastırıw boyınsha anıq tapsırmalar berildi.

Qaraqalpaqstan xabar agentligi