Nókis Olimpiya hám paralimpiya sport túrlerine tayarlaw orayında Ózbekstan dzyudo Federaciyası Qaraqalpaqstan bólimi hám Qaraqalpaqstan Respublikası Sport ministrliginiń shólkemlestiriwi menen Rossiya Federaciyasınan kelgen tájiriybeli dzyudoshı Vladimir Zoloev penen ushırasıw keshesi bolıp ótti.
Ushırasıwǵa dzyudo boyınsha trener-oqıtıwshılar hám sportshılar qatnasıp, sportshınıń basıp ótken ómir jolı hám sportta erisken jetiskenlikleri menen tanıstı.
Maǵlıwmat ushın aytatuǵın bolsaq, Qırǵız Respublikası saylandı komandası quramında kóp jıllar dawamında xalıqaralıq jarıslarda bir qatar tabıslardı qolǵa kirgiziwge miyasar boldı. Atap aytqanda, Vladimir Zoloev 81 kg salmaqta Aziya chempionı, Aziya oyınları, Almatı, Tashkent qalalarında ótkerilgen Gran-Pri jarısları, Evropa ashıq kuboginiń qola medalın jeńip alıwǵa eristi. 2011-jılı bolsa, jas óspirimler arasında ótkerilgen jáhán chempionatında da qola medalın qolǵa kirgizgen. Sonday-aq, ol 2021-jılı Tokioda bolıp ótken jazǵı Olimpiada oyınlarınıń qatnasıwshısı bolıp esaplanadı.
Endi bul sportshı respublikamızdıń jas sportshıları hám trenerlerine bir ay dawamında sheberlik sabaqların ótip, óziniń bay is-tájiribesi menen bólisedi. Házirgi waqıtta Nókis Olimpiya hám paralimpiya sport túrlerine tayarlaw orayında oqıw-shınıǵıwlar baslanıp ketti.

Adilbay Orazov,
Qaraqalpaqstan xabar agentligi sholıwshısı