2026-jıl ushın esaplanǵan minimal tutınıw qárejetleriniń bahası bir ayda adam basına 715 mıń sumdı quradı.
Statkomnıń málim etiwinshe, bul 2025-jıl (jıllıq) inflyaciyanıń azıq-awqat ónimleri, azıq-awqat emes ónimler hám xızmetler boyınsha baha indeksleri tiykarında óz aldına indekslew nátiyjesine bola esaplanǵan.
Atap ótiliwinshe, dúnya tájiriybesinde minimal tutınıw qárejetleri kórsetkishinen kámbaǵallıq shegarası sıpatında paydalanıw keń tarqalǵan bolıp, bul kórsetkishten:
– mámlekettiń materiallıq hám basqa da sociallıq járdemlerine mútáj xalıqtıń maqsetli (target) toparın anıqlaw;
– mámlekettiń kámbaǵallıq shegarasın belgilewde paydalanıw hám bunda target topardaǵı xalıqtıń real tutınıw ózgeshelikleri hám talapların esapqa alıw;
– kámbaǵallıqqa qarsı gúresiw strategiyası hám baǵdarlamalarında belgilengen wazıypa hám ilajlardıń nátiyjeliligin jáne mánzilliligin arttırıw, sonday-aq, olardıń turaqlı monitoringin alıp barıw;
– pensiyalar hám napaqalardıń eń az muǵdarın belgilew, sonday-aq, kámbaǵal shańaraqlarǵa beriletuǵın basqa túrdegi materiallıq járdemlerdi kórsetiwde norma sıpatında paydalanıladı.
Ózbekstan Respublikasında da bul ámeliyat aldınǵı xalıqaralıq tájiriybe hám usınıslar tiykarında islep shıǵılǵan hám ornatılǵan tártipte qabıl etilgen metodologiya tiykarında ámelge asırılıp kelinbekte,- dep málimleme beredi xabar.uz saytı.

Qaraqalpaqstan xabar agentligi