Prezident Shavkat Mirziyoevtiń basshılıǵında farmacevtika tarawın rawajlandırıw boyınsha tiykarǵı wazıypalarǵa baǵıshlanǵan videoselektor májilisi baslandı. Ilajda farmacevtika kárxanalarınıń wákilleri de qatnaspaqta.
Májiliste usı jılı farmacevtika boyınsha 1 milliard dollar muǵdarında jańa joybarlardı qáliplestirip, baslaw zárúr ekenligi atap ótildi.
Bunnan tısqarı, wálayatlardıń hákimlikleri tárepinen jámi 2,5 milliard dollarlıq farmacevtika joybarları boyınsha usınıslar tayarlanǵan. Bul joybarlar esabınan jılına 1 milliard dollarlıq importtıń ornın basatuǵın dárilerdi islep shıǵarıwdı jolǵa qoyıw múmkin.
Mısal ushın, Ándijanda 203 million dollarlıq 16 joybardı ámelge asırıw rejelestirilgen. Sonıń ishinde, 30 million dollarlıq joybarda Ózbekstanda birinshi márte qan plazmasınan insan albuminin islep shıǵarıwdı baslaw názerde tutılmaqta.
Sırdáryada da bıyıl 188 million dollarlıq joybardı iske qosıp, tek ǵana Awǵanstannıń ózine 50 million dollarlıq dári-dármaqlardı eksport etiw rejesi bar.
Biraq Nawayı, Qashqadárya, Surxandárya hákimleri usınıs etip atırǵan joybarlar 100 million dollarǵa da jetpeytuǵını kórsetip ótildi.
Usınılǵan joybarlardıń ekonomikalıq nátiyjeliligin úyrenip, ámelge asırıw ilajların kóriw tapsırıldı. Juwapkerlerge tómen quwatlılıqta islep atırǵan yamasa múlki bank balansına alınǵan kárxanalardı salamatlandırıw baǵdarlamasın baslaw wazıypası qoyıldı.

ÓzA