Prezident Shavkat Mirziyoevtiń basshılıǵında farmacevtika tarawın rawajlandırıw boyınsha tiykarǵı wazıypalarǵa baǵıshlanǵan videoselektor májilisi baslandı. Ilajda farmacevtika kárxanalarınıń wákilleri de qatnaspaqta.
Respublika boyınsha jámi 136 gektar maydanda 5 farmacevtika zonası shólkemlestirilip, infrastruktura menen baylanıslı barlıq máseleler sheship berilgen.
Biraq ayırım wálayat hákimleri, olardıń investiciya boyınsha orınbasarları farmacevtika joybarların óz halına taslap qoyǵanı sınǵa alındı.
Mısal ushın, 25 gektardaǵı Jizzaq farma zonasında ótken jılı ulıwma dári islep shıǵarılmaǵan. Yamasa Bostanlıq farma zonasındaǵı 14 gektar jer 2017-jıldan berli bos tur.
Ótken jılı Jizzaq hám Samarqandta birde-bir joybar iske qosılmaǵan bolsa, Buxarada tek ǵana 200 mıń, Xorezmde 2 million dollarlıq birewden joybar bolǵan.
Hákimler jańa joybarlardı kóbeytiw bılay tursın, bar quwatlıqlardı da islete almay atırǵanı kórsetip ótildi. Ótken jılı respublikadaǵı 96 kárxananıń aylanısı 312 milliard sumǵa azayǵan.