Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında student-jaslardıń ruwxıy dúnyaqarasın bayıtıw, milliy qádiriyatlarǵa húrmet ruwxın bekkemlew hám diniy ekstremizm hám terrorizm sıyaqlı qáwip-qáterlerge qarsı sergeklikti arttırıwǵa qaratılǵan aǵartıwshılıq ushırasıwı shólkemlestirildi.
Ilaj “Milliy qádiriyatlar hám olardıń millet ruwxıylıǵındaǵı ornı” jáne “Men diniy ekstremizm hám terrorizm qáwpin qalay túsinemen” temalarına baǵıshlandı.
Ushırasıwda Ózbekstan Respublikası Din isleri boyınsha komiteti Qaraqalpaqstan Respublikası aymaqlıq basqarmasınıń bas qánigesi X.Nezamatov, usı basqarmanıń hayal-qızlar máseleleri boyınsha qánigesi X.Ibragimova, IIMniń Terrorizmge qarsı gúresiw basqarmasınan S.Tanabergenov hám Nókis qalası “Muhammed Baxıy Iyshan” meshitiniń imam-xatibi Sh.Xudaybergenov, filialdıń professor-oqıtıwshıları hám student-jaslar qatnastı.
Qánigeler tárepinen milliy qádiriyatlardıń jámiyettiń ruwxıy turmısındaǵı ornı, jaslardıń sanasında salamat dúnyaqarastı qáliplestiriw, jat ideyalardıń aldın alıw hám diniy keńpeyillik principlerin bekkemlew máseleleri ayrıqsha atap ótildi. Shıǵıp sóylegenler globallasıw sharayatında málimleme aǵımınıń keskin artıp baratırǵanı jaslardı hár qıylı zıyanlı tásirlerden qorǵawda aǵartıwshılıq, sergeklik hám sın kózqarastan pikirlew úlken áhmiyetke iye ekeni aytılıp, diniy ekstremizm hám terrorizmniń tiykarǵı mánisi, olardıń jámiyettiń turaqlılıǵına salatuǵın qáwpi jáne bunday qáwip-qáterlerge qarsı gúresiwde hár bir puqaranıń juwapkershiligi haqqında túsinikler berildi.
Qánigeler jaslardı isenimsiz málimleme dereklerine berilmewge, nızamlarǵa húrmet ruwxında jasawǵa jáne milliy hám ulıwma insanıylıq qádiriyatlarǵa sadıq bolıwǵa shaqırdı.
Ashıq sáwbetlesiw tárizinde ótken ilaj soraw-juwaplarǵa bay bolıp, student-jaslar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi