Qaraqalpaqstan Respublikası Jaslar isleri basqarması tárepinen jaslar siyasatı tarawında ámelge asırılıp atırǵan ilajlar hám aldaǵı rejeler menen ǵalaba xabar qurallarınıń wákillerin jaqınnan tanıstırıw maqsetinde baspasóz konferenciyası ótkerildi.
Ilajda Qaraqalpaqstan Respublikası Jaslar isleri basqarması baslıǵınıń orınbasarı Maxset Tursınov tárepinen ámelge asırılǵan ilajlar, jańa baslamalar hám keleshekte ámelge asırılıwı rejelestirilgen jumıslar boyınsha maǵlıwmat berildi. Atap ótilgenindey, respublikada 30 jasqa shekemgi bolǵan 981 mıń 793 jas jasaydı.
2025-jıl dawamında jaslarǵa baylanıslı mámleketlik siyasattı ámelge asırıw boyınsha bir qatar ilajlar turmısqa engizildi. «Jaslar balansı»n qáliplestiriw maqsetinde 14-30 jas kategoriyasındaǵı jaslar arasında qayta xatlaw ótkerildi. Oǵan bola, 447 mıń 986 jas «jasıl», «sarı», «qızıl» kategoriyalarǵa dizimge alınǵan.
Jıl sońına shekem «awır» kategoriyadaǵı 9 mıń 88 jas 427 ministrlikler menen uyımlardıń basshılarına biriktirilip, 99,5 procentiniń bántligi támiyinlendi. «Bir kontur – bir ónim» principi tiykarında 7 mıńnan aslam jasqa jer maydanı berildi. Ózbekstan Respublikası Milliy banki, «Aloqabank» tárepinen 1 mıń 500 ge shamalas jaslarǵa 96,2 milliard sum, Jaslar qorı arqalı 113 jasqa 12 milliard sum muǵdarında jeńillikli kredit ajıratıldı. Sonday-aq, «Kómek» joybarı sheńberinde shetki hám alıs aymaqlarda oqıw orayların ashıw ushın 21 jasqa ssuda ajıratıldı.
Baspasóz konferenciyasında «Jaslar dápteri», «Bes baslama olimpiadası», «Ibrat farzandlari» hám basqa da joybarlar sheńberinde ámelge asırılıp atırǵan jumıslar, jaslar arasında huqıqbuzarlıqlardıń aldın alıw, sociallıq-profilaktikalıq hám mádeniy ilajlar, bos waqtın mazmunlı shólkemlestiriw baǵdarındaǵı ilajlar haqqında keń túrde maǵlıwmat berildi.
– 2026-jıldıń 24-fevral kúni Prezidentimiz Shavkat Mirziyoevtiń jaslardıń baslamaların qollap-quwatlaw boyınsha qosımsha imkaniyatlarǵa baǵıshlanǵan ushırasıwı ótkerilgen edi, – deydi basqarması baslıǵınıń orınbasarı M.Tursınov. – Bul ushırasıwda alǵa qoyılǵan baslamalar bizge jáne de úlken juwapkershilik júkledi. Aldaǵı waqıtlarda Elbasshımızdıń itibarın hám isenimin aqlawǵa háreket etemiz.
Ilaj dawamında videomateriallar kórsetilip, taraw boyınsha statistikalıq maǵlıwmatlar ashıq hám túsinikli tárizde usınıldı. Baspasóz konferenciyasınıń juwmaqlawshı bóliminde ǴXQ wákilleri, jurnalist hám blogerler tárepinen berilgen sorawlarǵa tolıq juwap berildi.

Qaraqalpaqstan xabar agentligi.