Nókis temir jol vokzalında Samarqand, Nawayı, Ferǵana, Jizzaq, Qashqadárya wálayatlarınan áskeriy xızmetke shaqırılǵan jigitler saltanatlı kútip alındı. Milliy armiyamızdıń qatarın azamat jigitler menen tolıqtırıw maqsetinde shólkemlestirilgen saltanatlı ilajda Qorǵanıw isleri basqarmasınıń juwapkerleri, MQX Shegara áskerleri oficerleri qatnastı.
Ilajda shıǵıp sóylegenler sońǵı jılları elimizdiń Qurallı Kúshleri sistemasında ámelge asırılıp atırǵan reformalar, armiyamızdıń jawıngerlik potencialınıń artıp atırǵanı hám áskerler ushın jaratılıp atırǵan zamanagóy sharayatlarǵa toqtap ótti.
Atap ótilgenindey, shegaralarımızdıń qol qatılmaslıǵın támiyinlew tek ǵana wazıypa emes, al hár bir jigit ushın muqaddes parız bolıp esaplanadı.
– Biz Watandı qorǵawday juwapkershilikli wazıypanı joqarı dárejede orınlawǵa, úyimizge jarqın júz benen qaytıwǵa wáde beremiz, – deydi bolajaq áskerlerdiń biri A.Alisherov.
Jańa mánzilge qádem. Saltanatlı kútip alıw máresiminen soń, jas Watan qorǵawshıları Nókis qalasında jaylasqan áskeriy bólimlerge jiberildi. Bul jerde olar áskeriy bilimlerdi iyelep, fizikalıq hám ruwxıy jaqtan shınıǵıw mektebinen ótedi.

Á.Jiyemuratov,
Qaraqalpaqstan xabar agentligi