Usı jıldıń 24-fevral kúni Prezidenttiń “Xalıqtı turaq jay menen támiyinlew jumısların jedellestiriw hám kóp kvartiralı turaq jaylar qurılısın nátiyjeli shólkemlestiriw ilajları haqqında”ǵı PP-29-sanlı pármanı qabıl etildi.
Tómendegiler usı Pármannıń tiykarǵı maqsetleri etip belgilendi, atap aytqanda:
• turaq jay qurılısın xoshametlew hám turaq jayǵa bolǵan huqıqtı ámelge asırıw ushın sharayatlar jaratıwǵa baylanıslı konstituciyalıq norma talapların orınlaw;
• kóp kvartiralı turaq jaylar bazarında talapqa muwapıq usınıslardı proporcional túrde arttırıp barıw;
• kóp kvartiralı turaq jaylardıń qurılısında jer ajıratıw hám ruqsat beriw tártip-qaǵıydaları processlerin óz ishine alǵan investiciyalıq-qurılıs dáwiriniń dawamlılıǵın 1,5 esege shekem qısqartıw.
Pármanǵa bola, Qaraqalpaqstan Respublikası hám wálayatlarda “Jańa Ózbekstan” massivleri ushın jańa aymaqlardı tańlap alıwdıń nızamshılıqta belgilengen normalarına sáykes keletuǵın joybarlarǵa “Jańa Ózbekstan” massivi statusın beriw arqalı olarǵa ámeldegi tártip-qaǵıydalar hám qarjılandırıw derekleri qollanıladı.
“Jańa Ózbekstan” massivleriniń jol-transport infrastrukturası joybarların islep shıǵıwda qayta tiklenetuǵın energiya dárekleri qurılmaları, energiyanı únemleytuǵın úskeneler, alternativ ıssılıq sistemalarınan keńnen paydalanıladı hám “jasıl” transport ortalıǵı jaratıladı.

Qaraqalpaqstan xabar agentligi