AQSh hám Ekvador narkotrafikke qarsı qospa operaciya ótkerdi
AQSh hám Ekvador áskerleri Latın Amerikasında “terrorshılıq shólkemleri” dep atalǵan toparlarǵa qarsı birgelikte ámeliyat ótkerdi. AQSh Qubla sárkardalıǵı operaciya juwmaqlanǵanın málim etti. Amerikalı áskeriy keńesgóyler rejelestiriw hám razvedka jumıslarında qatnasqan, tiykarǵı háreketler bolsa Ekvador qurallı kúshleri tárepinen ámelge asırılǵan. Operaciya detalları járiyalanbadı.
Iranda Mujtabo Xamenei jańa joqarı basshı etip saylandı
Iran Islam Respublikasında qaytıs bolǵan joqarı basshı Ayatollah Ali Xomanaiydiń ulı Mujtabo Xamenei mámlekettiń jańa diniy basshısı etip saylanǵanı xabar etildi. Qarar 88 ulamadan ibarat Keńes tárepinen qabıl etilgeni aytılmaqta. Házirshe rásmiy tastıyıqlanbaǵan, mámleketti waqıtsha úsh adamnan ibarat keńes basqarmaqta.
Siriya Livan menen shegarada áskeriy qatnasıwın kúsheytti
Siriya Qorǵanıw ministrligi Livan menen shegaradaǵı áskeriy háreketti kúsheytkenin málim etti. Aymaqqa piyada áskerler, bronlı texnika hám qısqa aralıqqa ushıwshı raketa qurılmaları jaylastırılǵan. Rásmiyler bul ilajlar shegara qadaǵalawı hám kontrabandaǵa qarsı gúresiw maqsetinde ámelge asırılıp atırǵanın atap ótti.
Dubaydaǵı AQSh konsullıǵına dron hújimi uyımlastırıldı
BAÁniń Dubay qalasındaǵı AQSh konsullıǵı dron hújimine ushıradı. Hádiyse aqıbetinde órt kelip shıqqan, ol qısqa waqıt ishinde saplastırılǵan. Jábirlengenler joq. Waqıya regiondaǵı áskeriy keskinlik fonında júz berdi.
Germaniya Ukrainaǵa gaz jetkerip atırǵanı haqqındaǵı dawalardı biykarladı
Germaniya húkimeti Ukrainaǵa “nemis gazi” jetkerip berilip atırǵanı haqqındaǵı dawalardı biykarladı. Rásmiylerge bola, mámleket aymaǵı arqalı tek ǵana tranzit aǵımları ótpekte. Ukraina kompaniyası tárepinen satıp alınǵan suyıltırılǵan tábiyǵıy gaz Ryugen atawında qayta gazlestirilip, qubırlar arqalı jetkerip berilmekte.
Hindstanda jasalma intellekt jaratqan jalǵan qararlar anıqlandı
Hindstan Joqarǵı sudı Andxra-Pradesh shtatındaǵı tómengi sudya múlk dawı boyınsha sheshim shıǵarıwda jasalma intellekt jaratqan jalǵan sud qararlarına súyengenin anıqladı. Sud insan qadaǵalawı zárúrligin atap ótip, isti qosımsha úyreniwge qarar etti.
Dúnyadaǵı eń abıraylı mámleketler — 2026-jıl reytingi
Global Soft Power Index 2026 reytingine bola, AQSh 74,9 ball menen birinshi orındı iyeledi. Ekinshi orında Qıtay jaylasqan. Evropa mámleketlerinen Ullı Britaniya, Germaniya hám Franciya joqarı kórsetkish kórsetken. Reyting mámlekettiń abırayı ekonomikalıq hám áskeriy qúdiretı menen birge xalıqaralıq isenim hám imidjge de baylanıslı ekenin kórsetedi.

Qaraqalpaqstan xabar agentligi