Ájiniyaz atındaǵı Nókis mámleketlik pedagogikalıq institutı Filologiya fakultetinde Qaraqalpaqstan Respublikasına miyneti sińgen jurnalist, jazıwshı Perdegúl Xojamuratova menen «Dóretiwshilikke ilhamlandırǵan kúsh» atamasındaǵı ushırasıw keshesi bolıp ótti.
Student-jaslardıń kórkem dóretiwshikke, jurnalistika hám kitapqumarlıqqa bolǵan qızıǵıwshılıǵın arttırıw, olardı erkin pikirlew hám dóretiwshilik penen shuǵıllanıwǵa ruwxlandırıw maqsetinde shólkemlestirilgen ilaj qatnasıwshıları dáslep Ájiniyaz muzeyinde boldı.
Ushırasıwda fakultet dekanı Gúlbáhár Begmuratova shıǵıp sóylep, Perdegúl Xojamuratovanıń jurnalistlik xızmetleri, jazıwshınıń dóretiwshilik jumısları haqqında maǵlıwmat berdi.
Qazaq tili hám ádebiyatı tálim baǵdarınıń studentleri jazıwshınıń shıǵarmaları, olardıń mazmunın qatnasıwshılarǵa tanıstırdı.
Ushırasıw dawamında Perdegúl Xojamuratova óziniń ómiri hám dóretiwshilik jolı, jurnalistika tarawına kirip keliwi, dáslepki maqala hám dóretpeleri, sonday-aq, dóretiwshilik jumısları dawamında dus kelgen sınaqlar hám toplaǵan tájiriybeleri haqqında aytıp berdi.
Student-jaslar menen bolıp ótken soraw-juwaplar oǵada qızǵın boldı. Jaslar jurnalistikanıń ózine tán ózgeshelikleri menen birge, jazıwshı shıǵarmalarınıń mazmunı, tematikası, syujeti boyınsha ózlerin qızıqtırǵan sorawlarǵa juwap aldı. Jazıwshı jaslarǵa óz ústinde tınımsız islew, kóp kitap oqıw hám qábiletin jetilistirip barıw boyınsha usınısların berdi.
Ushırasıw sońında qazaq tili hám ádebiyatı kafedrasınıń baslıǵı Írıstı Quttımuratova shıǵıp sóylep, Perdegúl Xojamuratovanıń shıǵarmaları jaslar arasında súyip oqılatuǵınlıǵın atap ótti hám miymanǵa bayram sawǵaların tapsırdı.
Ilaj instituttıń talantlı student-jaslarınıń atqarıwındaǵı kórkem-ádebiy bólim menen dawam etti.

Qaraqalpaqstan xabar agentligi