Jaqın Shıǵıs regionında júzege kelgen áskeriy kelispewshilik sebepli bir qatar mámleketler hawa aymaǵın waqtınsha jawǵanı málim etildi. Usı múnásibet penen 28-fevraldan baslap Ózbekstannan Dubay, Sharja, Madina, Doxa, Jidda, Tel-Aviv, Tegeran hám Kuveyt jónelislerindegi aviaqatnawlar biykar etilgen. Nátiyjede 28-fevral – 2-mart kúnleri 1 681 Ózbekstan puqarası reyslerden paydalana almaǵan.

Prezident Shavkat Mirziyoevtiń tapsırmasına bola, Persiya qoltıǵı mámleketlerinde qalıp ketken puqaralardı watanǵa qaytarıw jumısları shólkemlestirilgen. Transport ministrligi tárepinen aviakompaniyalar menen birgelikte anıq reje islep shıǵılıp, “Ózaviaciya” agentliginde 24 saat isleytuǵın shtab dúzilgen.

Atap ótiliwinshe, házirgi waqıtqa shekem Madina hám Jiddadan 21 reys arqalı 4 948 jolawshı, sonday-aq, Dubaydan 235 jolawshı Ózbekstanǵa alıp kelingen.

Puqaralarǵa reysler boyınsha maǵlıwmatlardı tek ǵana aviakompaniyalardıń rásmiy derekleri arqalı anıqlaw usınıs etilmekte.

ÓzA