Ózbekstan Respublikası Prezidentiniń 2026-jıl 2-fevraldaǵı “Ózbekstan Respublikası puqaralarınıń múddetli áskeriy xızmetke gezektegi shaqırılıwı hám belgilengen xızmet múddetin ótep bolǵan múddetli áskeriy xızmetkerlerdi Qurallı Kúshler rezervine bosatıw haqqında”ǵı qararınıń orınlanıwın támiyinlew maqsetinde usı jıldıń mart-aprel aylarında pútkil elimiz boylap jaslardı múddetli áskeriy xızmetke shaqırıw ilajları qızǵın dawam etpekte.
Usı jıldıń 4-mart kúni Nókis qalasınıń orayındaǵı Ózbekstan hám Qaraqalpaqstan Respublikalarınıń mámleketlik bayraqları jaylasqan maydanda múddetli áskeriy xızmetke shaqırılıwshılardı shıǵarıp salıwǵa arnalǵan saltanatlı ilaj bolıp ótti.
Saltanatlı ilajda Qaraqalpaqstan Respublikası Joqarǵı Keńesiniń Baslıǵı, Arqa-batıs áskeriy okrugi sárkardalıǵı, MQX Shegara áskerleri basshıları, Qurallı Kúshler quramındaǵı ministrlikler hám uyımlardıń aymaqlıq basshıları, sonday-aq, mámleketlik hám jámiyetlik shólkemlerdiń wákilleri, nuraniylar hám áskerlerdiń ata-anaları qatnastı.
Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, bir qatar jaslardıń múddetli áskeriy xızmetti ótewge múnásip dep tabılıp, ana Watan aldındaǵı perzentlik parızın ótew ushın ketip baratırǵanı múnásibeti menen qutlıqladı.
Sońǵı jılları Prezidentimiz – Qurallı Kúshlerimiz Joqarǵı Bas Sárkardası tárepinen elimizdiń qorǵanıw potencialın kúsheytiw, Qurallı Kúshlerimizdi bekkemlew, áskerlerdi hár tárepleme qollap-quwatlaw hám basqa da usı baǵdardaǵı máselelerge úlken itibar qaratılıp atırǵanın atap ótiw orınlı.
Usınday keń kólemli ilajlar nátiyjesinde Milliy armiyamız xalqımızdı isenimli qorǵaw menen birge, jas áwladtı mártlik, Watanǵa muhabbat hám sadıqlıq sezimleri menen tárbiyalaytuǵın turmıs mektebine aylanıp, onda hár tárepleme salamat jaslar kamalǵa kelmekte.
Búgingi ózbek armiyası tek ǵana mámleketimiz shegaraların qorǵaytuǵın qúdiretli kúsh emes, al jaslar ushın haqıyqıy turmıs mektebine, erk-ıqrar hám xarakterdi shınıqtırıwshı mártlik mákanına aylandı. Búgingi qatarda turǵan jaslar tek ǵana shaqırılıwshılar emes. Olar intellektuallıq potencialı, fizikalıq tayarlıǵı hám ruwxıy jetikligi menen júzlegen zamanlasları arasınan qatań sınaqlar tiykarında tańlap alınǵan jigitler bolıp esaplanadı.
– Ulımnıń ásker bolıwı – shańaraǵımız ushın úlken bayram. Búgin onıń ústindegi áskeriy kiyimdi kórip, qanshelli úlkeygenin sezdim. Mine, búgin ekinshi balam Sanjar Watan aldındaǵı jigitlik parızın orınlaw ushın bir jıllıq áskerlikke jónep ketip baratır. Úlken ulım da bir jıl shegarada ásker bolıp edi. Ilayım aman barıp, saw qaytsın. Elimizde paraxatshılıq bolsın, barlıq jaslarǵa haq jol tileymiz, – deydi ata-analardıń biri Q.Asamatdinov.
– Men Nókis qalasınanman. Qatarlarım menen birge áskeriy xızmetke ketip baratırman. Watanıma sadıq bolıwǵa, aq júzli, abıraylı bolıp, belgilengen minnetli wazıypamdı jaqsı atqarıp qaytıwǵa háreket etemen, deydi shaqırıwshılardıń biri Á.Joldasbaev.
Ilajdıń eń tolqınlandırıwshı máwriti nuranıylardıń pátiyaǵa qol jayǵan waqıtları boldı. Kekseler duwaǵa qol jayıp elimizdiń tınıshlıǵı turaqlı bolıwın, áskerlerimizdiń qádemi qutlı kelip, aman-esen xızmet etip qaytıwın niyet etti. Ilaj áskeriy orkestr tárepinen atqarılǵan nama-qosıqlar hám jas kórkem óner sheberleriniń watansúyiwshilik haqqındaǵı shıǵıwları menen dawam etti.
Ótkerilgen ilajda áskeriy orkestr namaları astında Watandı qorǵawǵa atlanǵan jaslar áskerler qatarına shıǵarıp salındı. Múddetli áskeriy xızmetke shıǵarıp salıw ilajları mámleketimizdiń barlıq qala hám rayonlarında shólkemleskenlik penen dawam etpekte.

Á.Jiyemuratov,
Qaraqalpaqstan xabar agentligi.
M.Habibullaevtıń túsirgen súwretleri