Tashkent qalasında 3-mart kúni Qıtay Xalıq Respublikasınıń Shensi provinciyası delegaciyasınıń qatnasıwında Ózbekstan – Qıtay biznes-forumı bolıp ótti.
Ilajda Qıtaydıń 70 ten aslam kompaniya hám finans institutları, sonday-aq, Ózbekstan isbilermen toparları jáne tiyisli ministrlikler menen uyımlardıń wákilleri qatnastı.
Mámleketimiz tárepine investiciyalar, sanaat hám sawda ministriniń orınbasarı Ilzat Qosimov basshılıq etti. Qıtay delegaciyasına bolsa Shensi provinciyası Xalıq húkimeti gubernatorınıń orınbasarı Li Czyun basshılıq etti.
Qıtay tárepiniń wákilleri arasında “China Railway First Group”, “China Railway 20th Bureau Group”, “Shaanxi Construction Engineering Holding Group”, “Shaanxi Coal and Chemical Industry Corporation” sıyaqlı iri kompaniyalardıń wákilleri de bar.
Forumnıń isbilermenlik bóliminde ekonomikalıq birge islesiwdiń ámeliy kórsetkishleri hám perspektivadaǵı rejeler dodalandı. 2025-jıldıń juwmaǵı boyınsha óz-ara sawda kólemi 17,8 milliard dollarǵa jetip, 34 procentlik ósiw atap ótildi. Jaqın jıllarda bul kórsetkishti 20 milliard dollarǵa jetkeriw maqset etilgen.
2025-jılı Ózbekstan ekonomikasına ózlestirilgen Qıtay investiciyalarınıń kólemi 15,8 milliard dollardı quradı. 2026-jılı bul sandı 21 milliard dollarǵa jetkeriw rejelestirilgen.
Házirgi waqıtta ulıwma bahası derlik 58,8 milliard dollarǵa teń birgeliktegi joybarlar portfeli ámelge asırılmaqta. Olar energetika, sanaat, ximiya, mashina qurılısı, toqımashılıq, logistika, málimleme texnologiyaları hám “jasıl” ekonomika sıyaqlı tiykarǵı tarawlardı qamtıp alǵan.
Strategiyalıq áhmiyetke iye infrastrukturalıq joybarlar, sonıń ishinde, “Qıtay-Qırǵızstan-Ózbekstan” temir jolınıń qurılısı ayrıqsha atap ótildi. Bul baslama jańa Evraziya transport koridorın qáliplestiriwde áhmiyetli buwın sıpatında bahalanbaqta.
B2B sóylesiwler sheńberinde sanaat kooperaciyası, shiyki zattı tereń qayta islew, óndiristi lokalizaciyalaw, sonday-aq, Ózbekstanda jumıs alıp barıp atırǵan on Ózbekstan – Qıtay sanaat zonalarınıń jumısın keńeytiw máseleleri dodalandı. Investiciyalıq baslamalardı qarjılay qollap-quwatlaw mexanizmlerine de ayrıqsha itibar qaratıldı.
Keleshektegi birge islesiwdiń tiykarǵı baǵdarları sıpatında joqarı texnologiyalar hám sanlı ekonomikada sanaat kooperaciyasın rawajlandırıw, “jasıl” energetika joybarların ámelge asırıw, energiyanı únemleytuǵın sheshimlerdi engiziw, Sian qalasında ótkeriliwi rejelestirilgen Úshinshi aymaqlararalıq forumǵa tayarlıq kóriw, sonday-aq, “Bir mákan – bir jol” globallıq baslaması sheńberinde birgeliktegi joybarlardı muwapıqlastırıw belgilendi.

Behruz XUDOYBERDIEV, ÓzA