Elimizde ázelden shembilik dástúri xalıqtı birlestiriwshi, jaqsılıq hám awızbirshilikti bekkemlewshi qádiriyat sıpatında qáliplesken.
Máhálle kóshelerin abat etiw, jap-salmalardı tazalaw, háwli hám jámiyetlik orınlardı tártipke keltiriw sıyaqlı jumıslar usı shembilik járdeminde ámelge asırılıp, jámiyette óz-ara miyrim-shápáát hám awızbirshilik ortalıǵın kúsheytip kelgen.
Usı jılı 13-14-mart kúnleri mámleketimiz boylap keń kólemli ulıwma xalıqlıq shembilik ótkeriledi.
Bul haqqında Ministrler Kabinetiniń tiyisli qararında áhmiyetli wazıypalar belgilep berilgen.
Shembilikler “Elimiz abadanlıǵı, bárinen burın, máhálleden baslanadı!” súreni astında shólkemlestiriledi.
Bul ulıwmaxalıqlıq ilaj sheńberinde máhálleler, elatlı punktler, sociallıq taraw obektleri, bilimlendiriw mákemeleri, zıyarat etiw orınları hám qoyımshılıqlar átirapı abadanlastırıladı. Nál egiw, aymaqlardı kóklemzarlastırıw, shıǵındılardı saplastırıw, jol hám háwlilerdi tártipke keltiriw jumısları ámelge asırıladı.
Shembilik tek ǵana tazalıq hám abadanlastırıw jumısları emes, al puqaralar arasındaǵı awızbirshilikti bekkemlew, jaslarda watansúyiwshilik hám juwapkershilik sezimin arttırıwǵa xızmet etedi. Ásirese, máhálle institutınıń jumısın kúsheytiw, xalıqtıń óz jasaw aymaǵına tiyislilik sezimin arttırıwda bunday ilajlar úlken áhmiyetke iye.

Muhayyo Toshqoraeva, ÓzA