Beruniy rayonı Birlik máhállesindegi Sabirovlar shańaraǵı shampinon zamarrıqların jetistiriwdi jolǵa qoydı. Zamarrıqtıń shampinon sortı paydalanıwdaǵı eń kóp ushırasatuǵın túri bolıp esaplanadı. 50 metr maydanda úshinshi márte jetistirilip atırǵan ónim bir hápteden tayar bolıp, jıynap-terip alıw múmkin boladı.
Shuxrat Sabirov 2025-jıl noyabr ayında zamarrıq jetistiriwdi baslaǵan hám birinshi ónimnen 300 kilogramm zúráát aldı. Tiykarınan, Xorezm wálayatı hám Nókis qalasına buyırtpalar jetkerip berilmekte. Zamarrıq tuqımı Franciya mámleketinen alıp kelingen bolıp, bul ónimdarlı sort esaplanadı. Qaraqalpaqstan sharayatında shampinon zamarrıǵın jetistiriw úlken tájiriybe talap etedi. Bunı Shuxrat Ándijan wálayatındaǵı tanıslarınan úyrenip, jetistiriwdi jolǵa qoydı.
– Sh.Sobirov shańaraǵı menen birgelikte isbilermenlikti basladı, – deydi Birlik máhállesiniń hákim járdemshisi Javlon Jabbiev. – Ishki bazarda zamarrıqqa bolǵan talaptı qanaatlandırıw hám ónimniń bahasın arzanlatıwǵa úles qosıp kelmekte. Rayonımızdaǵı “Agrobank” AKB filialı tárepinen 100 million sum muǵdarında jeńilletilgen kredit ajıratılıwı rejelestirilgen. Keleshekte bul tájiriybeni jáne de keńeytip, jer maydanın 200 metrge jetkeriw, jumısshılardıń sanın tórtten 15 ke shekem jetkeriw rejelestirilgen.
Úy sharayatında dáramat tabıwdıń jańa túri boyınsha Beruniy tájiriybesiniń jolǵa qoyılıwı xalıqtıń abadan turmıs keshiriwin támiyinlewge úles qosadı.

Qaraqalpaqstan xabar agentligi