Kartoshka dúnyada eń kóp paydalanılatuǵın hám eń áhmiyetli azıq-awqat ónimlerinen biri bolıp esaplanadı. Ol tek ǵana kúndelikli awqatlanıw racionımızdıń ajıralmas bólegi emes, al awıl xojalıǵı hám azıq-awqat qáwipsizliginde de úlken áhmiyetke iye. Házirgi kúnde kartoshka hár qıylı taǵamlardı tayarlawda keńnen qollanılıp, millionlap insanlardıń tiykarǵı energiya deregi bolıp xızmet etedi.
Mámleketimizde xalıqtıń kartoshkaǵa bolǵan talabın qanaatlandırıw, ishki bazarda bahalardıń turaqlılıǵın támiyinlew hám ónim jetistiriwshilerdi sapalı tuqım menen támiyinlew boyınsha sistemalı reformalar jolǵa qoyılǵan.
Ótken jılǵı ónim ushın respublika boyınsha jámi 237 mıń gektar maydanǵa kartoshka egilgen, sonnan 97 mıń gektarı fermer xojalıqları, 140 mıń gektarı bolsa diyqan xojalıqları hám xalıqtıń qıytaq jerleriniń úlesine tuwra keledi. Respublikadaǵı barlıq kategoriyadaǵı xojalıqlar tárepinen 4 160 185 tonna kartoshka zúrááti jıynap alınǵan. Bul kórsetkish 2024-jılǵa salıstırǵanda 0,2 procentke ósken.
Taraw wákilleri tárepinen usınılǵan maǵlıwmatlarǵa bola, 2027-jılı fermer hám awıl xojalıǵı kárxanalarında 2,5 mıń tonna, 2028-jılı 27 mıń tonna, 2029-jılı 147 mıń tonna hám 2030-jılı 747 mıń tonna joqarı áwladlı tuqımlıq kartoshka jetistiriw rejelestirilgen. Sonday-aq, bıyılǵı jıldıń ónimi ushın kartoshka egiletuǵın maydanlar 284 mıń gektarǵa jetkeriledi. Bul maydanlarda 4,5 million tonna ónim jetistiriw maqset etilgen.
2025-jılı Qaraqalpaqstan Respublikasında 113 008, Ándijan wálayatında 530 666, Buxara wálayatında 305 960, Jizzaq wálayatında 126 577, Qashqadárya wálayatında 230 125, Nawayı wálayatında 131 051, Namangan wálayatında 420 348, Samarqand wálayatında 773 598, Surxandárya wálayatında 394 525, Sırdárya wálayatında 74 871, Tashkent wálayatında 415 368, Ferǵana wálayatında 480 007, Xorezm wálayatında 163 175, Tashkent qalasında 906 tonna kartoshka jetistirilgen.

ÓzA