Mámleketimizde bántlikti arttırıw hám xalıqtıń kásiplik potencialın rawajlandırıwǵa qaratılǵan sistemalı jumıslar dawam etpekte.
Endi óz betinshe kásip úyrenip atırǵan, járdemge mútáj hám bánt bolmaǵan shaxslar mamanlıq sertifikatların alıw arqalı óz kásiplik bilim hám kónlikpelerin rásmiy túrde tastıyıqlay aladı.
Bul wazıypa Prezident Shavkat Mirziyoevtiń 2026-jıl 16-fevralda qabıl etilgen “Máhálleni rawajlandırıw hám jámiyetti ilgeriletiw” jılında tiykarǵı baǵdarlar boyınsha reformalar baǵdarlamalarında jáne “Ózbekstan – 2030” strategiyasın ámelge asırıw boyınsha mámleketlik baǵdarlamada belgilep berildi.
Pármanǵa muwapıq, hár bir aymaqtıń sanaat, qánigelesiw hám xızmet kórsetiw tarawlarındaǵı talapları tiykarında 24 mamanlıqtı bahalaw orayı shólkemlestiriledi. Oraylarda miynet bazarında áhmiyetli bolǵan keminde eki kásip boyınsha mamanlıq sertifikatların beriw ámeliyatı jolǵa qoyıladı.
Sonday-aq, járdemge mútáj, jumıssız hám bánt bolmaǵan shaxslar Bántlikke kómeklesiw qorınıń qarjıları esabınan vaucher sisteması arqalı mamanlıqtı bahalaw xızmetlerinen paydalanıw imkaniyatına iye boladı. Bul arqalı olar óziniń kásiplik potencialın arttırıw hám maman kadr sıpatında qáliplesiw imkaniyatına iye boladı.
Bul sistema sheńberinde 60 áhmiyetli kásipler boyınsha kásiplik imtixan ushın bahalaw quralları islep shıǵılıp, ekspertizadan ótkeriledi. Sonıń menen birge, tarmaq keńesleri tárepinen tayınlanǵan 120 bahalawshı ekspertlerdiń mamanlıǵı arttırıladı hám ekspertler korpusı qáliplestiriledi. Olar mamanlıqtı bahalaw procesiniń ádil hám nátiyjeli bolıwın támiyinleydi.
Hújjetke bola, sistemanı engiziw procesi 2026-jıl 1-marttan baslanıp, 1-iyulden tolıq iske qosıladı.
Ámelge asırıw procesinde tarmaq keńesleri, Bilimlendiriwdiń sapasın támiyinlew milliy agentligi janındaǵı Milliy mamanlıq sistemasın rawajlandırıw institutı, Kásiplik bilimlendiriw agentligi hám Kámbaǵallıqtı qısqartıw hám bántlik ministrligi menen tıǵız birge islesiw jolǵa qoyıladı.

M.Hojiakbarova, ÓzA