Múbárek Ramazan ayı – kewillerdi tazalaytuǵın, insanlardı jaqsılıqqa shaqıratuǵın, miyrim-shápáát hám saqawat sezimlerin jáne de bekkemleytuǵın muqaddes ay. Bul ayda ámelge asırılǵan hár bir sawaplı ámel, kórsetilgen jaqsılıq insan qálbinde shúkirshilik hám miyrim-shápáát sezimlerin oyatadı.
Ramazan ayı múnásibeti menen Prezidentimizdiń baslamaları tiykarında Bajıxana komiteti tárepinen respublikamızdıń Ámiwdárya, Beruniy hám Tórtkúl rayonlarında qoy soyılıp, mútáj shańaraqlarǵa tarqatıldı. Bul iygilikli ámel arqalı kóplegen shańaraqlardıń dasturxanı jáne de payızlı boldı. Ásirese, shetki awıllarda jasaytuǵın kem támiyinlengen watanlaslarımız ushın bunday itibar hám ǵamqorlıq ayrıqsha quwanısh baǵıshladı.
Ramazan – bul tek ǵana oraza tutıw emes, al mehir úlestiriw, saqawat kórsetiw, mútájlerge járdem beriw ayı bolıp esaplanadı. Bajıxana xızmetkerleri tárepinen ámelge asırılǵan bul qayırqomlıq ilajı da mine, usı iygilikli qádiriyatlardıń ámeliy kórinisi boldı.
Sonday-aq, usı rayonlarda xalıqtıń járdemge mútáj wákilleri ushın iftarlıq dasturxanları jayıldı.
Bul ilajda shıǵıp sóylegenler xalqımızdı muqaddes Ramazan ayı menen qutlıqlap, ótkerilip atırǵan ilajlar adamlar arasında miyrim-shápáát, tuwısqanlıq baylanısların jáne de bekkemlewge, fizikalıq imkaniyatı sheklengen, járdemge mútáj insanlardı qollap-quwatlawǵa qaratılǵan iygilikli ámeller ekenin hám Ramazan ayınıń pazıyletleri, miyrim-shápáát hám saqawatlıqtıń áhmiyetli ekenligin atap ótti.
Duwaǵa ashılǵan qollar, jası úlkenlerdiń qızǵın tilekleri iftarlıq dasturxanına ózgeshe payız baǵıshladı.
Bunday iygilikli ámeller respublikamızdıń basqa aymaqlarında da dawam ettirilmekte.

Á.Jiyemuratov,
Qaraqalpaqstan xabar agentligi