Oliy Majlis Nızamshılıq palatasınıń deputatı B.Aldamuratov Shımbay rayonındaǵı Keńes APJda máhálle turǵınları hám máhálle jetiligi menen ushırastı.
Ushırasıwda mámleketimizde sońǵı jılları ámelge asırılıp atırǵan jumıslar, Prezidentimiz tárepinen qabıl etilip atırǵan qarar hám pármanlar, 2026-jıl Mámleketlik baǵdarlaması hám Ózbekstan – 2030 strategiyasında belgilep berilgen tiykarǵı wazıypalar, barlıq tarawlar sıyaqlı máhálle sistemasına qaratılıp atırǵan itibar boyınsha máseleler dodalandı.
Puqaralardıń mashqala hám usınısları da tıńlandı. Ayırım mashqalalar boyınsha nızam sheńberinde túsindiriw jumısları alıp barılǵan bolsa, múddet talap etetuǵın múrájatlar qadaǵalawǵa alındı. Ushırasıw dawamında deputat usı APJ aymaǵındaǵı 4-sanlı ulıwma bilim beriw mektebi hám jańadan iske qosılǵan IT qalasha Jaslar málimleme texnologiyaları orayınıń jumısı menen de jaqınnan tanıstı.
Deputattıń ushırasıwları Kókshi qala hám Doslıq máhállelerinde de dawam etti. Kókshi qala MPJ aymaǵındaǵı isbilermenlik subektlerinen biri bolǵan «ZANG TEX» iyirilgen jip islep shıǵarıw kárxanasında boldı.
Maǵlıwmat ornında, bul kárxananıń ulıwma bahası 199,2 mlrd. sum bolıp, kárxana tiykarınan iyirilgen jip islep shıǵarıwǵa qánigelesken. Pakistanlı «HD SONS» sırt el kárxanası menen jolǵa qoyılıp atırǵan bul joybar tek ǵana texnologiyalıq jańalıq emes, al aymaqtıń eksport potencialın túp-tiykarınan ózgertiwshi kúsh bolıp esaplanadı. Ónimleri 100 procent eksportqa baǵdarlanǵan. «ZANG TEX» kárxanası tolıq quwatlılıqta 200 orınǵa mólsherlengen bolıp, búgingi kúnde 150 jańa jumıs ornı jaratılǵan, sonday-aq, jıllıq eksport kólemi 6,6 mln. AQSh dolların quraydı.
Xalıq wákili bul kárxananıń jumısı menen jaqınnan tanısıp, ónimniń sapası, eksport-import potencialı, jumısshılar ushın jaratılǵan sharayatlar, jańa zamanagóy texnologiyalardıń sapa dárejesi, olardıń xızmetleri hám funkciyaları, kárxananıń keleshektegi maqset hám rejeleri menen de pikir alısıldı.
Deputat Doslıq máhállesinde máhálle jetiligi hám máhálle aymaǵında jańadan qurılǵan 47-sanlı ulıwma bilim beriw mektebin de barıp kórdi. Mámleketimiz basshısınıń 2025-jıl 8-oktyabrdegi “Ayırım rayon (qala) hám máhállelerdi xalıqtıń jasawı hám isbilermenlik jumısı menen shuǵıllanıwı ushın úlgi aymaqqa aylandırıw ilajları haqqında”ǵı qararında belgilengen wazıypalardan kelip shıǵıp, bul mektep zamanagóy tipte qurılǵan bolıp, 240 orınǵa mólsherlengen zamanagóy ásbap-úskeneler menen támiyinlengen, barlıq qolaylıqlarǵa iye. Deputat mektep jumısı menen jaqınnan tanısıp, óziniń pikir-usınısların da bildirip ótti. Kúnniń ekinshi yarımında xalıq wákiliniń ushırasıwı Qaraózek rayonında da dawam etti.

Qaraqalpaqstan xabar agentligi