Jınayat isleri boyınsha Bozataw rayonı sudınıń tergew sudyası Qayrat Qıpshaqbaev tárepinen Berdaq atındaǵı Qaraqalpaq mámleketlik universitetinde student-jaslardıń qatnasıwında huqıqıy úgit-násiyat ilajı ótkerildi.
Onda 2025-jıl dawamında joqarı bilimlendiriw orınları studentleri tárepinen islengen huqıqbuzarlıqlar tallanıp, keleshekte bunday jaǵdaylardıń aldın alıwǵa qaratılǵan túsinik jumısları alıp barıldı.
Atap ótilgenindey, sońǵı waqıtları student jaslar tárepinen islenip atırǵan huqıqbuzarlıqlar tiykarınan jol háreketi qáwipsizligi qaǵıydaların buzıw menen baylanıslı. Atap aytqanda, aynası qaraytırılǵan transport qurallarınan paydalanıw, avtomobil basqarıw waqtında telefonnan paydalanıw, belgilengen tezlikti asırıw, svetofordıń qadaǵan etiwshi signalına boysınbaw, qarsı háreketleniw jolına shıǵıw sıyaqlı qaǵıydabuzarlıqlar keń tarqalıp atırǵanına toqtap ótti. Sonday-aq, jol háreketi qáwipsizligi qaǵıydaların buzıw, topar bolıp qáwipli háreketleniw, transport quralın más halda basqarıw, aydawshılıq huqıqısız transport basqarıw, licenziyasız jolawshı tasıw, mayda biyzarılıq, jámiyetlik orınlarda spirtli ishimliklerdi ishiw, nızam talaplarına boysınbaw, sonday-aq, internet tarmaqlarında jalǵan málimleme tarqatıw sıyaqlı huqıqbuzarlıqlar ushın da nızamshılıqta juwapkershilik belgilengeni hár tárepleme túsindirildi. Sudya bul huqıqbuzarlıqlardıń áhmiyeti hám olar ushın qollanılatuǵın jaza sharaları haqqında mısallar tiykarında tolıq maǵlıwmatlar berildi.
Ushırasıw sheńberinde kóshpeli ashıq sud májilisi de ótkerildi. Onda Ózbekstan Respublikası Hákimshilik juwapkershilik haqqındaǵı kodekstiń 176-3-statyası (avtomobil transportında jolawshı tasıw jumısı menen licenziyasız shuǵıllanıw) boyınsha 18 shaxsqa qaratılǵan hákimshilik isler kórip shıǵıldı. Sud tárepinen huqıqbuzarlıqtı birinshi márte islep, belgilengen 30 kún ishinde qaǵıydanıń buzılıwın ıqtıyarlı saplastırǵanı – yaǵnıy jolawshı tasıw ushın tiyisli licenziya alǵanı esapqa alınǵanı ushın 11 huqıqbuzarǵa baylanıslı is óndiristen qısqartıldı. Qalǵan 7 shaxsqa bolsa, nızam sheńberinde hákimshilik járiyma jazası tayınlandı.
Ótkerilgen bul ilajdıń tiykarǵı maqseti – jaslar arasında huqıqbuzarlıqlardıń aldın alıw, olardı nızamlarǵa húrmet hám boysınıw ruwxında tárbiyalawdan ibarat. Ushırasıw dawamında studentler ózlerin qızıqtırǵan sorawlarǵa juwaplar aldı. Ásirese, kóshpeli sud májilisi jaslarda hár qanday huqıqbuzarlıq ushın juwapkershilik bar ekenligi haqqında anıq huqıqıy túsinik qáliplestirdi.

Ziyada Turǵanbaeva,
Indira Kuvandikova,
Berdaq atındaǵı QMUdıń 2-kurs studentleri.
Qaraqalpaqstan xabar agentligi