“Qaraqalpaqstan Respublikasın 2026-jılda sociallıq-ekonomikalıq rawajlandırıw hám kelesi jıllarǵa mólsherlengen baǵdarlamalardı tastıyıqlaw haqqında”ǵı Prezident qararına bola, 2026-jıl 1-aprelden hákimshilik basqarıw jaǵınan Nókis qalası quramına kiriwshi “Qarataw” hám “Bestebe” mákan puqaralar jıyınları xalqına mámleketlik mektepke shekemgi bilimlendiriw shólkemlerinde bala támiynatı ushın ata-analar tólemine 50 procent azaytıwshı koefficientler qollanıladı.
Sonday-aq, maydanı 5 mıń kvadrat metrden joqarı bolǵan sawda kompleksleri hám miymanxana (jaylastırıw quralları) xızmetleri boyınsha usı aymaqta jumısın ámelge asırıp atırǵan isbilermenlerge 2027-jıl 1-yanvardan 2040-jıl 1-yanvarǵa shekem jer salıǵı hám múlk salıǵı stavkaları 90 procentke azaytılǵan halda qollanıladı.
2028-jıl 1-yanvarǵa shekem:
– Qaraqalpaqstan Respublikası aymaǵında jaylasqan kommerciyalıq banklerdiń balansında bolǵan múlk obektleri bazar bahasında qayta bahalanıp, 10 jıl dawamında procentsiz bólip tólew shárti menen tikkeley realizaciyalanadı;
– satılǵan múlk obektleri boyınsha dúzilgen aldı-sattı shártnamalarına muwapıq tólemler 6 ay ishinde tolıq tólengende shártnama bahasınıń 25 procentine teń muǵdarda shegirmeler beriledi, – dep málimleme beredi xabar.uz saytı.

Qaraqalpaqstan xabar agentligi