Mámleketimizde Ózbekstan xalıq shayırı Zulfiyanıń tuwılǵan kúniniń 111 jıllıǵına baǵıshlanǵan ruwxıy-aǵartıwshılıq ánjumanlar bolıp ótpekte.
Ózbekstan Respublikası Shańaraq hám hayal-qızlar komiteti, Ózbekstan Jazıwshılar awqamı jáne bir qatar ministrlikler hám uyımlar menen birgelikte shayırdıń tuwılǵan kúniniń 111 jıllıǵı múnásibeti menen paytaxtımızda bir qatar mádeniy-aǵartıwshılıq ilajlar ótkerildi.
Áne usınday ádebiy ánjuman Jazıwshılar qıyabanında, Zulfiya esteliginiń janında ótkerildi. Máresimde túrli ministrlikler hám uyımlar, jámiyetlik shólkemler, dóretiwshi zıyalılar, bilimlendiriw mákemeleriniń wákilleri, jaslar hám keń jámiyetshilik qatnastı.
Ilajda Zulfiya Isroilovanıń ádebiyat, millettiń ruwxıy rawajlanıwında tutqan ornınıń teńsiz ekeni, onıń dóretiwshiligi arqalı ózbek hayalınıń gózzallıǵı, sabır-taqatı ádebiyatta joqarı kórkemlik kórinisin tapqanı atap ótildi.
Zulfiyaxanım tımsalında ózbek hayalınıń ruwxıy kelbeti, sadıqlıǵı hám pidayılıǵı jámlengeni, búgingi kúnde hayal-qızlardıń jámiyetlik-siyasiy belsendiligin arttırıw, olardıń jámiyettegi abırayın bekkemlew mámleketlik siyasat dárejesindegi áhmiyetli wazıypa ekeni atap ótildi. Zulfiya dóretiwshiligi jas áwladtı watansúyiwshilik hám ruwxıy jetiklik ruwxında tárbiyalawda úlken áhmiyetke iye ekeni atap ótildi.
– Zulfiyaxanım – Ózbekstan xalıq shayırı, belgili jámiyetlik ǵayratker sıpatında tek ǵana ádebiyatımız emes, al jámiyetimizdiń ruwxıy turmısında da óshpes iz qaldırǵan ullı tulǵa, – dedi Ózbekstan Respublikası Bas ministriniń orınbasarı – Shańaraq hám hayal-qızlar komitetiniń baslıǵı Zulayho Mahkamova. – Onıń mazmunlı dóretiwshiligi, pidayı jámiyetlik jumısı ásirese hayal-qızlardıń jámiyetlik-siyasiy belsendiligin arttırıw, olardıń jámiyettegi ornı hám abırayın bekkemlewde úlken áhmiyetke iye boldı. Shayırdıń shıǵarmalarında Watanǵa muhabbat, insanıylıq, opadarlıq hám sadıqlıq, tınıshlıq hám jaqsılıq ideyaları tereń sáwlelendirilgen. Onıń qosıqları insan qálbin pákleydi, rawajlanıwǵa shaqıradı, ruwxıy jetiklikke jeteleydi. Zulfiya dóretiwshiligi – bul muhabbat hám sadıqlıq sabaǵı, mánawiyat mektebi.
Ilaj sheńberinde Zulfiya atındaǵı Mámleketlik sıylıq iyeleriniń mushayrası bolıp ótti. Onda student-qızlar tárepinen Zulfiyaxanım qosıqlarınan úlgiler oqıldı.
Ilajda ustaz shayır, Ózbekstanda xızmet kórsetken mádeniyat xızmetkeri Muhtarama Uluǵova Zulfiyaxanımnıń poeziyasındaǵı kishipeyillik hám ruwxıy tereńlik haqqında toqtap ótip, onıń dóretiwshiligi ózbek ádebiyatında óz aldına mektep jaratqanın atap ótti.
Sonday-aq, “Saodat” jurnalınıń bas redaktorı Munavvara Usmonova Zulfiyaxanımnıń usı jurnal jumısındaǵı tariyxıy ornı, onıń hayal-qızlar aǵartıwshılıǵı hám jámiyetlik pikirdi qáliplestiriwdegi xızmetleri haqqında ayttı. Zulfiya tek ǵana shayır emes, al ruwxıy tárbiyashı, millet hayal-qızları ushın ibrat mektebi ekeni atap ótildi.
Ózbekstan xalıq shayırı Abdulla Sher bolsa óziniń shıǵıp sóylegen sózinde Zulfiyaxanım dóretiwshiligindegi Watanǵa muhabbat, opadarlıq, sadıqlıq hám adamgershilik ideyaları ádebiyatımızda óshpes iz qaldırǵanı, onıń poeziyası xalıqtıń qálbine jaqınlıǵı menen máńgi ekenligine toqtap ótti.
Xalqımız ázelden hayaldı muqaddes sanap, onıń shańaraq hám jámiyetlik turmıstaǵı ornın joqarı qádirlep kelgen. Mine, usı joqarı húrmet hám itibardıń ayqın kórinisi sıpatında 1999-jılı Zulfiya atındaǵı Mámleketlik sıylıq shólkemlestirildi. Bul sıylıq qábiletli, intaker hám joqarı mánawiyatlı qızlarımızdı hár tárepleme qollap-quwatlaw, olardı jańa jetiskenlikler hám sheklerge ruwxlandırıwǵa qaratılǵan mámleketlik tán alıwdıń abıraylı úlgisi bolıp esaplanadı.
Búgingi kúnge shekem bilimlendiriw, ilim, ádebiyat, mádeniyat, kórkem óner, sport, málimleme texnologiyaları hám jámiyetlik jumıs tarawlarında joqarı nátiyjelerge erisken 480 qábiletli hayal-qız usı sıylıq penen sıylıqlanǵan.
Mádeniy-aǵartıwshılıq ushırasıwda shayırdıń bay dóretiwshilik miyrası boyınsha pikir-usınıslar bildirildi. Onıń qosıqları hám dástanlarınan úzindiler oqıldı, klassikalıq hám zamanagóy nama-qosıqlar atqarıldı. Ilaj sońında qatnasıwshılar tárepinen Zulfiya esteligine gúller qoyıldı.
Zulfiyaxanım esteligine baǵıshlanǵan saltanatlı ilajǵa Ózbekstan Respublikası Prezidenti keńesgóyi, Ózbekstan xalıq jazıwshısı Xayriddin Sultonov, Bas ministrdiń orınbasarı – Shańaraq hám hayal-qızlar komitetiniń baslıǵı Zulayho Mahkamova qatnastı.

Nazokat Usmonova, ÓzAnıń xabarshısı